IPL 2024: ഐപിഎല്‍ 2024 സീസണില്‍ പ്ലേ ഓഫ് കാണാതെ പുറത്താകുന്ന രണ്ടാമത്തെ ടീമായി പഞ്ചാബ് കിങ്‌സ്. നിര്‍ണായക മത്സരത്തില്‍ റോയല്‍ ചലഞ്ചേഴ്‌സ് ബെംഗളൂരുവിനെതിരെ 60 റണ്‍സിന്റെ തോല്‍വി വഴങ്ങിയതോടെയാണ് പഞ്ചാബിന്റെ വഴികള്‍ അടഞ്ഞത്. ആദ്യം ബാറ്റ് ചെയ്ത ബെംഗളൂരു നിശ്ചിത 20 ഓവറില്‍ ഏഴ് വിക്കറ്റ് നഷ്ടത്തില്‍ 241 റണ്‍സ് നേടിയപ്പോള്‍ പഞ്ചാബ് കിങ്‌സ് 17 ഓവറില്‍ 181 ന് ഓള്‍ഔട്ടായി.
അതേസമയം റോയല്‍ ചലഞ്ചേഴ്‌സ് ബെംഗളൂരു പ്ലേ ഓഫ് പ്രതീക്ഷകള്‍ നിലനിര്‍ത്തി. 12 കളികളില്‍ നിന്ന് അഞ്ച് ജയത്തോടെ 10 പോയിന്റുള്ള ആര്‍സിബി ഇപ്പോള്‍ ഏഴാം സ്ഥാനത്താണ്. ശേഷിക്കുന്ന രണ്ട് മത്സരങ്ങളില്‍ മികച്ച മാര്‍ജിനില്‍ വിജയിക്കുന്നതിനൊപ്പം മറ്റു ടീമുകളുടെ ജയപരാജയങ്ങള്‍ കൂടി ആശ്രയിച്ചായിരിക്കും ആര്‍സിബിയുടെ സാധ്യതകള്‍.
