ആവശ്യമെങ്കില്‍ ഇലോണ്‍ മസ്‌കിന് അഭയം നല്‍കാന്‍ തയ്യാറാണെന്ന് റഷ്യ. സ്റ്റേറ്റ് ഡ്യൂമ കമ്മിറ്റി ഇന്റര്‍നാഷണല്‍ അഫയേഴ്‌സിന്റെ ഫസ്റ്റ് ഡെപ്യൂട്ടി ചെയര്‍മാന്‍ ദിമിത്രി നോവികോവാണ് ഇക്കാര്യം പറഞ്ഞത്. റഷ്യയുടെ ഔദ്യോഗിക വാര്‍ത്ത ഏജന്‍സിയോടാണ് അദ്ദേഹം ഈ കാര്യം പറഞ്ഞത്. മസ്‌കും അമേരിക്കന്‍ പ്രസിഡന്റ് ഡൊണാള്‍ഡ് ട്രംപുമായുള്ള തര്‍ക്കങ്ങള്‍ കടുക്കുന്നതിനിടയിലാണ് റഷ്യ മസ്‌കിന് അഭയം നല്‍കാവുന്ന വാഗ്ദാനവുമായി വരുന്നത്.
അതേസമയം ട്രംപ്- മസ്ക് കലഹത്തില്‍ ഇടപെടാന്‍ തങ്ങള്‍ക്ക് താല്പര്യമില്ലെന്ന് റഷ്യ വ്യക്തമാക്കി. അത് യുഎസിന്റെ ആഭ്യന്തര വിഷയമാണെന്നും അതില്‍ ഇടപെടാനോ അഭിപ്രായം പറയാനോ ഇല്ലെന്നും റഷ്യന്‍ വക്താവ് പറഞ്ഞു. അടുത്തിടെയാണ് അമേരിക്കന്‍ സര്‍ക്കാരിന്റെ കാര്യക്ഷമതാ വകുപ്പില്‍ നിന്ന് മസ്ക് പടിയിറങ്ങിയത്. ഇതിനുശേഷം ട്രംപിനെതിരെ രൂക്ഷ വിമര്‍ശനമാണ് മസ്ക് ഉന്നയിച്ചത്.
