പിരാനകള്‍ പാഞ്ഞെത്തി; ആറുവയസുകാരിയെ കടിച്ചുകീറി, കുട്ടി മരിച്ചു
യാത്രക്കിടയില്‍ അപ്രതീക്ഷിതമായി വെള്ളപ്പൊക്കമുണ്ടായതിനെ തുടര്‍ന്ന് ബോട്ട് മറിഞ്ഞ് വെള്ളത്തില്‍ വീണ ആറു വയസുകാരി പിരാന മത്സ്യങ്ങളുടെ ആക്രമണത്തില്‍ കൊല്ലപ്പെട്ടു. മോണ്ടി അലഗ്രയിലെ നദിയില്‍ ബോട്ടിംഗ് നടത്തുന്നതിനിടെയാണ് അപകടം നടന്നത്.
മുത്തശിക്കൊപ്പം അവധി ആഘോഷിക്കുന്നതിനിടെ ബോട്ട് യാത്ര നടത്താന്‍ എത്തിയതായിരുന്നു അഡ്രില മുനിസും കുടുംബത്തിലെ നാല് കുട്ടികളും. ഇവര്‍ ബോട്ട് യാത്ര നടത്തുന്നതിനിടെയാണ് നദിയില്‍ അപ്രതീക്ഷിതമായി വെള്ളപ്പൊക്കമുണ്ടായത്. അതോടെ ബോട്ട് മറിഞ്ഞ് എല്ലാവരും നദിയില്‍ വീഴുകയായിരുന്നു. എല്ലാവരും പെട്ടെന്ന് തന്നെ ബോട്ടില്‍ തിരികെ കയറിയെങ്കിലും അഡ്രിലയെ പിരാന മത്സ്യങ്ങള്‍ ആക്രമിക്കുകയായിരുന്നു.
കുട്ടിയെ രക്ഷിച്ച് തിരികെ ബോട്ടില്‍ കയറ്റിയെങ്കിലും കാലിലെ മാംസം കൊലയാളി മല്‍സ്യങ്ങള്‍ കടിച്ചെടുത്തു. കുട്ടിയെ ഉടന്‍ തന്നെ പിടിച്ച് ബോട്ടില്‍ കയറ്റി ആശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാന്‍ കഴിഞ്ഞില്ല.
