അമേരിക്കയും ഉറച്ചുതന്നെ, ഐ എസിനെ വേരോടെ പിഴുതെടുക്കും!

ലോകത്തിനെതിരെ യുദ്ധം പ്രഖ്യാപിച്ചിരിക്കുന്ന ഇസ്ലാമിക് സ്റ്റേറ്റിനെതിരെ കടുത്ത നടപടിക്ക് അമേരിക്ക. ഐ എസിനെതിരെ യുദ്ധം ചെയ്യുന്നവർക്ക് എല്ലാ പിന്തുണയും അമേരിക്ക പ്രഖ്യാപിച്കു. പാരിസ് ആവർത്തിക്കാതിരിക്കാനും ഐ എസിനെ ഇല്ലാതാക്കാനും ആവശ്യമായ എല്ലാ നടപടിയും സ്വീകരിക്കുമെന്ന് അമേരിക്കൻ പ്രസിഡന്റ് ബരാക് ഒബാമ അറിയിച്ചു.

പാരിസിൽ ഉണ്ടായത് പരിഷ്‌കൃത ലോക്കത്തിനെതിരായ ആക്രമണമാണെന്ന് ഒബാമ പറഞ്ഞു. ഇതിനുത്തരവാദികളായവരെ അമർച്ച ചെയ്യാനായി അമേരിക്കയുടെ എല്ലാവിധ പിന്തുണയും ഒബാമ പ്രഖ്യാപിച്ചു. തുർക്കിയിൽ തുടരുന്ന ജി20 ഉച്ചകോടിയിൽ ഐ എസിനെതിരെ കടുത്ത പ്രതിഷേധമാണ് ഉയരുന്നത്.

ഐ എസിനെതിരായ സൈനിക നീക്കത്തിൽ കൂടുതൽ ശ്രദ്ധിക്കണമെന്ന് റഷ്യയോട് യൂറോപ്യൻ രാജ്യങ്ങൾ ആവശ്യപ്പെട്ടു. അതേസമയം,സിറിയയിൽ ഇസ്ലാമിക് സ്റ്റേറ്റിന്റെ ശക്തികേന്ദ്രങ്ങളിൽ ഫ്രഞ്ച് യുദ്ധവിമാനങ്ങൾ ആക്രമണം നടത്തി. റാഖ്‌ക കേന്ദ്രമാക്കി നടത്തിയ വ്യോമാക്രമണത്തിൽ വലിയ നശനഷ്ടവും ആളപായവും ഉണ്ടായതായാണ് സൂചന.

ഐ എസ് നടത്തിയ ആക്രമണത്തിൽ ഫ്രാൻസ് ശക്തമായ തിരിച്ചടി നൽകുമെന്ന് പ്രസിഡന്റ് ഫ്രൻസ്വെ ഒലോൻദ് പ്രഖ്യാപിച്ചിരുന്നു. ഇതിന് തൊട്ടുപിന്നാലെയാണ് സിറിയയിൽ ഐ എസ് ശക്തികേന്ദ്രങ്ങളിൽ ഫ്രഞ്ച് വിമാനങ്ങൾ ആക്രമണം നടത്തിയിരിക്കുന്നത്.

129 പേരാണ് പാരീസിൽ നടത്തിയ ആക്രമണങ്ങളിൽ കൊല്ലപ്പെട്ടത്. വളരെ ആസൂത്രിതമായാണ് ഐ എസ് ഭീകരർ ഫ്രൻസിൽ ആക്രമണം അഴിച്കുവിട്ടതെന്നാണ് റിപ്പോർട്ടുകൾ. ജിഹാദി ജോണിന്റെ കൊലപാതകത്തെ തുടന്ന് പെട്ടെന്നുണ്ടായ പ്രകോപനമല്ല ഈ ആക്രമണത്തിനു പിന്നിൽ എന്നാണ് വിലയിരുത്തൽ. ഏറെ നാൾ സമയമെടുത്ത് ആസൂത്രണം ചെയ്ത അക്രമണ പദ്ധതിയാണ് പരീസിൽ നടപ്പാക്കിയതെന്നാണ് റിപ്പോർട്ടുകൾ.