കോവിഡ് മുക്തി നേടിയ ശേഷവും നിങ്ങള്‍ക്ക് എന്തെങ്കിലും ആരോഗ്യപ്രശ്‌നങ്ങള്‍ നേരിടുന്നുണ്ടെങ്കില്‍ അതിനെ ഗൗരവമായി എടുക്കണം. കോവിഡ് നെഗറ്റീവ് ആയ ശേഷവും ചിലര്‍ക്ക് ഗുരുതരമായ ആരോഗ്യപ്രശ്‌നങ്ങള്‍ നേരിടുന്നതായി റിപ്പോര്‍ട്ടുകളുണ്ട്. ശ്വാസകോശ സംബന്ധമായ അസ്വസ്ഥതകളാണ് കോവിഡ് കൂടുതല്‍ ഉണ്ടാക്കുക. എന്നാല്‍, മറ്റ് അസ്വസ്ഥതകളും കോവിഡ് മൂലം ഉണ്ടായേക്കാം. രോഗത്തില്‍ നിന്നു മുക്തി നേടിയ ശേഷവും ഈ ആരോഗ്യപ്രശ്‌നങ്ങള്‍ അലട്ടാന്‍ സാധ്യതയുണ്ട്.
ഹൃദയത്തിന്റെ ആരോഗ്യം മോശമായാല്‍ അടിയന്തരമായി വൈദ്യസഹായം തേടേണ്ടതാണ്. നെഞ്ചില്‍ അസ്വസ്ഥത തോന്നുക, കൈകള്‍ ഉയര്‍ത്തുമ്പോഴും താഴ്ത്തുമ്പോഴും വേദന, അകാരണമായി ശരീരം വിയര്‍ക്കുക, ക്രമം തെറ്റിയുള്ള ഹൃദയമിടിപ്പ്, ശാരീരികമായി ബുദ്ധിമുട്ടുള്ള കാര്യങ്ങള്‍ ഒന്നും ചെയ്യാതെ തന്നെ നല്ല ക്ഷീണം തോന്നുക, എപ്പോഴും ഉറങ്ങാന്‍ തോന്നുക തുടങ്ങിയ ലക്ഷണങ്ങള്‍ കോവിഡ് നെഗറ്റീവ് ആയ ശേഷവും നിങ്ങളില്‍ പ്രകടമാണെങ്കില്‍ ഉടനെ മെഡിക്കല്‍ ചെക്കപ്പിനു വിധേയമാകണം. ഹൃദയത്തിന്റെ ആരോഗ്യം എങ്ങനെയെന്ന് അറിയാന്‍ പ്രത്യേക ചെക്കപ്പുകള്‍ നടത്തിനോക്കേണ്ടതാണ്.
