ആഭ്യന്തര പ്രശ്‌നങ്ങള്‍ രൂക്ഷം; സൂപ്പര്‍താരം യുണൈറ്റഡിൽ നിന്ന് പുറത്തേക്ക്
മാഞ്ചസ്റ്റർ യുണൈറ്റഡിൽ തുടരുന്ന ആഭ്യന്തര പ്രശ്‌നങ്ങള്‍ തുറന്നു കാട്ടി സൂപ്പര്‍താരം ഡേവിഡ് ഡി ഗിയ ക്ലബ്ബ് വിടാനൊരുങ്ങുന്നതായി റിപ്പോര്‍ട്ട്.
പരിശീലകനായ മൌറീന്യോയുമായും ചില സഹതാരങ്ങളുമായും നിലനില്‍ക്കുന്ന പൊരുത്തക്കേടാണ് താരത്തെ പുതിയ നീക്കത്തിന് പ്രേരിപ്പിക്കുന്നതെന്ന് ഇംഗ്ലീഷ് മാധ്യമമായ ദി ടെലിഗ്രാഫ് റിപ്പോര്‍ട്ട് ചെയ്‌തു.
ഈ സീസണിൽ ടീം മോശം പ്രകടനം തുടരുന്നതിനാല്‍ യുണൈറ്റഡുമായി കരാർ പുതുക്കേണ്ടതില്ലെന്ന ഉറച്ച തീരുമാനത്തിലാണ് ഡി ഗിയ. പരിശീലകനെ നീക്കുന്നതടക്കമുള്ള ആവശ്യങ്ങളും താരം ഉന്നയിച്ചെന്നാണ് റിപ്പോര്‍ട്ട്.
കരാർ പുതുക്കിയില്ലെങ്കിൽ ഈ സമ്മറിൽ തന്നെ ഡി ഗിയയെ വിൽക്കാൻ യുണൈറ്റഡ് നിർബന്ധിതമായേക്കും. ഇല്ലെങ്കിൽ താരത്തെ ഫ്രീ ട്രാൻസ്ഫറിൽ നഷ്ടപ്പെടുമെന്നതാണ് പ്രധാന പ്രശ്നം. ഈ സാഹചര്യത്തില്‍ കടുത്ത സമ്മര്‍ദ്ദത്തിലാണ് യുണൈറ്റഡുള്ളത്.
