Sookshma Darshini Social Media Review: നസ്രിയയുടെ വരവ് ചുമ്മാതല്ല, സക്‌സസ് സ്റ്റാറായി ബേസിലും; സൂക്ഷ്മദര്‍ശിനി കൊള്ളാമെന്ന് സോഷ്യല്‍ മീഡിയ

Sookshma Darshini

Sookshma Darshini Social Media Review: ബേസില്‍ ജോസഫ്, നസ്രിയ നസീം എന്നിവരെ കേന്ദ്ര കഥാപാത്രങ്ങളാക്കി എം.സി.ജിതിന്‍ സംവിധാനം ചെയ്ത 'സൂക്ഷ്മദര്‍ശിനി'ക്ക് മികച്ച പ്രേക്ഷകാഭിപ്രായം. പ്രേക്ഷകരെ ചിരിപ്പിക്കാനും ത്രില്ലടിപ്പിക്കാനും സിനിമയ്ക്ക് സാധിക്കുന്നുണ്ടെന്നും ധൈര്യമായി കുടുംബസമേതം ടിക്കറ്റെടുക്കാമെന്നും പ്രേക്ഷകര്‍ പ്രതികരിക്കുന്നു. 'നോണ്‍സെന്‍സ്' എന്ന ചിത്രത്തിനു ശേഷം ജിതിന്‍ സംവിധാനം ചെയ്തിരിക്കുന്ന 'സൂക്ഷ്മദര്‍ശിനി' മിസ്റ്ററി ത്രില്ലര്‍ ഴോണറില്‍ ഉള്‍പ്പെടുന്നതാണ്. 

അടുക്കളയിലെ ജനാലയിലൂടെ അടുത്ത വീട്ടിലേക്ക് പതിവായി നോക്കിയിരിക്കുന്ന പ്രിയദര്‍ശിനി എന്ന വീട്ടമ്മയിലൂടെയാണ് സിനിമയുടെ കഥ മുന്നോട്ടു പോകുന്നത്. അടുത്ത വീട്ടില്‍ താമസിക്കാന്‍ എത്തുന്ന മാനുവലില്‍ ചില നിഗൂഢതകള്‍ പ്രിയദര്‍ശിനി കണ്ടെത്തുന്നു. ഈ നിഗൂഢതകളുടെ ചുരുളഴിക്കാന്‍ പ്രിയദര്‍ശിനി നടത്തുന്ന യാത്രയാണ് സിനിമ. 

ആദ്യ പകുതിയില്‍ തന്നെ നിഗൂഢത നിറയ്ക്കാനും പ്രേക്ഷകരെ പിടിച്ചിരുത്താനും സംവിധായകനു സാധിക്കുന്നുണ്ട്. അപ്രതീക്ഷിത ട്വിസ്റ്റുകളും മികച്ചൊരു ക്ലൈമാക്‌സുമാണ് ചിത്രത്തിന്റേതെന്ന് പ്രേക്ഷകര്‍ ഒന്നടങ്കം പറയുന്നു. പ്രിയദര്‍ശിനിയായി നസ്രിയയും മാനുവല്‍ ആയി ബേസിലും വേഷമിട്ടിരിക്കുന്നു. ഇരുവരുടെയും പ്രകടനം മികച്ചതാണെന്നും ചിരിപ്പിക്കുകയും ത്രില്ലടിപ്പിക്കുകയും ചെയ്യുന്നതിനാല്‍ കുടുംബ പ്രേക്ഷകര്‍ക്ക് ഈ സിനിമ ഇഷ്ടപ്പെടുമെന്നുമാണ് സോഷ്യല്‍ മീഡിയയില്‍ പലരും അഭിപ്രായപ്പെട്ടിരിക്കുന്നത്.