മലയാള സിനിമയും കാമ്പുള്ള കഥകള്‍ ഉപേക്ഷിച്ച് ചേരുവകളുടെയും സൂത്രവാക്യങ്ങളുടെയും പിന്നാലെ പായുന്നു എന്നതിന്‍റെ ഉത്തമോദാഹരണമാണ് വിഷു ചിത്രമായ അണ്ണന്‍ തമ്പി. സംവിധായകന്‍റെയും തിരക്കഥാകൃത്തിന്‍റെയും കഴിഞ്ഞകാല പ്രകടനം അടിസ്ഥാനമാക്കി ഈ ചിത്രത്തെ കുറിച്ച് , സ്ഥാനത്തോ അസ്ഥാനത്തോ, പ്രേക്ഷകര്‍ കുറച്ച് ഊഹങ്ങളും നടത്തിയിരുന്നു.
മമ്മൂട്ടി എന്ന മെഗാതാരത്തിനപ്പുറം മറ്റൊരു മായക്കാഴ്ചയും ഈ സിനിമയിലൂടെ സൃഷ്ടിക്കാന്‍ അന്‍‌വര്‍ റഷീദിനു കഴിഞ്ഞില്ല. എന്തായാലും പ്രേക്ഷകര്‍ക്ക് അന്‍‌വറില്‍ മാത്രം പഴിചാരാനും ആവില്ല- കാരണം കഥയില്ലായ്മയാണ് അണ്ണന്‍തമ്പി എന്ന ചിത്രത്തിന്‍റെ ഏറ്റവും വലിയ കുറവ്.
ബാലെ ആശാനായ രാവുണ്ണി (ജനാര്‍ദ്ദനന്‍) യുടേയും പദ്മാവതി (ഊര്‍മ്മിള ഉണ്ണി) യുടേയും ഇരട്ടക്കുട്ടികളാണ് അണ്ണനും തമ്പിയും. ഇവര്‍ക്ക് സെക്കന്‍ഡുകളുടെ പ്രായ വ്യത്യാസമേ ഉള്ളൂ. എന്നാല്‍, ജ്യോതിഷ വിധി പ്രകാരം ഇവര്‍ രണ്ട് ഗണമായതിനാല്‍ ഒത്തു പോവില്ല. ഇരട്ടകളില്‍ അണ്ണന്‍ അപ്പുവും തമ്പി അച്ചുവും (രണ്ടും മമ്മൂട്ടി). അച്ചു ഊമയാണ്.
WD
ഇരുവരും പരസ്പരം ശത്രുതയോടെ പെരുമാറുന്നതിനാല്‍ അപ്പുവിനെ പൊള്ളാച്ചിയിലുള്ള വിശ്വംഭരന്‍ (മണിയന്‍പിള്ള രാജു) അമ്മാവന്‍റെ വീട്ടില്‍ താമസിപ്പിക്കാന്‍ തീരുമാനമാവുന്നു. അവിടെ അപ്പു മുഴുത്ത ഒരു ചട്ടമ്പിയായി വളരുന്നു. നാട്ടില്‍ മാതാപിതാക്കന്‍‌മാരുടെ കൂടെ യാണെങ്കിലും അച്ചുവും ഒരു ചട്ടമ്പി തന്നെയാണ്. ബാലെയും ചില്ലറ പലിശയ്ക്ക് കൊടുപ്പ് പരിപാ‍ടിയുമാണ് അച്ചുവിന്‍റെ തൊഴില്‍. ശത്രുക്കള്‍ക്കെതിരെ അണ്ണനും തമ്പിയും ഒരുമിച്ച് പോരാടി ജയിക്കുമ്പോള്‍ സിനിമ അവസാനിക്കും.
WD
മമ്മൂട്ടിക്ക് ഒന്നും ചെയ്യാനില്ലായിരുന്ന ചിത്രത്തില്‍ ഹാസ്യത്തിന്‍റെ മേമ്പൊടിയോടെ സന്ദര്‍ഭങ്ങളെ മുതലാക്കുന്നതില്‍ സുരാജ് വെഞ്ഞാറുമ്മൂട്, സലിം കുമാര്‍ എന്നിവര്‍ ഒരു പരിധി വരെ വിജയിച്ചു. രാജമാണിക്യം എന്ന സിനിമയില്‍ മമ്മൂട്ടിയെ ടിപ്പിക്കല്‍ തിരുവനന്തപുരം ഭാഷ പറയിക്കാന്‍ അന്‍‌വറിന് സാധിച്ചു. മമ്മൂട്ടി എന്ന മെഗാതാരത്തെ മാറ്റിയെടുത്തതോടെ ചിത്രം ഭാഷയുടെ അതിര്‍ത്തി കടന്നും വിജയം കൊണ്ടുവന്നു. എന്നാല്‍, ഇവിടെ സംസാരിപ്പിച്ചും അല്ലാതെയും മമ്മൂട്ടിയുടെ സാന്നിധ്യം മാത്രമാണ് സംവിധായകന്‍ ഉപയോഗിച്ചിരിക്കുന്നത്.
സാധാരണ മലയാള സിനിമകളെ പോലെ ഈ ചിത്രത്തിലും നായികമാര്‍ക്ക് പ്രത്യേകിച്ച് ഒന്നും ചെയ്യാനുള്ള അവസരമില്ല. ഗോപിക നായിക വേഷത്തിന്‍റെ പരിധിയില്‍ നന്നായി അഭിനയിച്ചു. നാടന്‍ വേഷങ്ങളിലേക്ക് ഇഴുകി ചേരാന്‍ ആവാത്തതോ എന്തോ, പൊള്ളാച്ചിയിലെ അപ്പുവിന്‍റെ ഭാര്യയാവാന്‍ ലക്‍ഷ്മി റായി എന്തായാലും പോര. രാജന്‍ പി ദേവ്, സിദ്ധിഖ് എന്നിവരുടെ വേഷങ്ങള്‍ക്ക് പറയത്തക്ക പോരായ്മയില്ല.
WD
ഛായാഗ്രഹണ മികവ് ഒന്നും ഈ ചിത്രത്തില്‍ ദൃശ്യമല്ല. സാധാരണ സംഭവം സാധാരണ രീതിയില്‍ തന്നെ ലോകനാഥന്‍ പകര്‍ത്തിയിരിക്കുന്നു. അതേ പോലെ തന്നെയാണ് ഗാനങ്ങളും- അസാധാരണമായി ഒന്നുമില്ല.
മമ്മൂട്ടിയുടെ സാന്നിധ്യവും തമാശയുടെ മേമ്പൊടിയും പ്രേക്ഷകരെ രണ്ട് മണിക്കൂര്‍ തിയേറ്ററിനുള്ളില്‍ തള്ളിവിടാന്‍ സഹായിച്ചേക്കും. എന്നാല്‍, സംവിധാനം അന്‍‌വര്‍ റഷീദാണ്, തിരക്കഥ ബെന്നി പി നായരമ്പലമാണ് എന്ന പ്രതീക്ഷയോടെ ചെന്നാല്‍ നിരാശരായി മടങ്ങാം.
