ഉണ്ടയുടെ ആദ്യലുക്ക് പോസ്റ്റര്‍ പുറത്തിറങ്ങി. മിനിറ്റുകള്‍ക്കുള്ളില്‍ ഇത് വൈറലാകുകയും ചെയ്തു. ചിത്രത്തിന്‍റെ മൂഡ് മുഴുവന്‍ വ്യക്തമാക്കുന്ന ഫസ്റ്റ് ലുക്ക് പോസ്റ്ററാണ് പുറത്തുവന്നിരിക്കുന്നത്. നക്സല്‍ ബാധിത പ്രദേശത്ത് ഡ്യൂട്ടിയുള്ള പൊലീസുകാര്‍ അവരുടെ വാനിന്‍റെ പഞ്ചറായ ടയര്‍ മാറുന്ന രംഗമാണ് പോസ്റ്ററില്‍. പൊലീസുകാരില്‍ ഒരാളായി മമ്മൂട്ടിയെയും കാണാം.
നവാഗതനായ ഹര്‍ഷദ് തിരക്കഥയെഴുതുന്ന സിനിമയില്‍ അര്‍ജുന്‍ അശോകന്‍, ആസിഫ് അലി, വിനയ് ഫോര്‍ട്ട്, ഷൈന്‍ ടോം ചാക്കോ, കലാഭവന്‍ ഷാജോണ്‍, ജേക്കബ് ഗ്രിഗറി, സുധി കോപ്പ, ദിലീഷ് പോത്തന്‍ തുടങ്ങിയവര്‍ അഭിനയിക്കുന്നു. പ്രശാന്ത് പിള്ളയാണ് സംഗീതം.
