പൃഥ്വിരാജ് പിന്‍‌മാറി, റോഷന്‍ ആന്‍ഡ്രൂസിന്‍റെ പുതിയ നായകന്‍ കുഞ്ചാക്കോബോബന്‍, ഒരു സ്വപ്നപദ്ധതി അണിയറയില്‍ ഒരുങ്ങുന്നു!
പദ്‌മരാജൻ സിനിമകളുടെ പേരുപോലെ ആകർഷണീയം എന്നായിരുന്നു റോഷൻ ആൻഡ്രൂസ് തൻറെ പുതിയ പടത്തിൻറെ പേര് പ്രഖ്യാപിച്ചപ്പോൾ തോന്നിയത് - 'നാളെ രാവിലെ'. പൃഥ്വിരാജ് നായകനാകുന്ന ചിത്രത്തിൽ നൈല ഉഷ നായികയാകുമെന്നായിരുന്നു റിപ്പോർട്ടുകൾ. സഞ്‌ജയ് ബോബിയുടേതായിരുന്നു തിരക്കഥ. റോഷനും സഞ്‌ജയും ബോബിയും കഴിഞ്ഞ ഒരു പതിറ്റാണ്ടിലധികമായി മനസിലിട്ട് താലോലിച്ച സബ്‌ജക്ടായിരുന്നു അത്. പിന്നീട് കേട്ടത് ഈ പ്രൊജക്ടില്‍ നിന്ന് പൃഥ്വി പിന്‍‌മാറി എന്നാണ്. അതിനുശേഷം കുറച്ചുകാലമായി ‘നാളെ രാവിലെ’ എന്ന പ്രൊജക്ടിനെപ്പറ്റി അധികം വാര്‍ത്തകള്‍ വന്നില്ല.
റോഷന്‍ ആന്‍ഡ്രൂസ് ഇതിനിടെ ഹൌ ഓള്‍ഡ് ആര്‍ യു, 36 വയതിനിലേ എന്നീ സിനിമകള്‍ ചെയ്തു. ഇപ്പോള്‍ ‘സ്കൂള്‍ ബസ്’ എന്ന സിനിമ പൂര്‍ത്തിയാക്കി. ഇതാ പുതിയ വാര്‍ത്ത വരുന്നു. റോഷന്‍ ആന്‍ഡ്രൂസിന്‍റെ അടുത്ത സിനിമ ‘നാളെ രാവിലെ’. നായകന്‍ കുഞ്ചാക്കോ ബോബന്‍!
'കോമ' സ്റ്റേജിൽ കഴിയുന്ന ഒരാളുടെ പ്രണയമാണ് ഈ സിനിമയുടെ പ്രമേയമെന്ന് സൂചനയുണ്ട്. ഗുസാരിഷ്, മുല്ലവള്ളിയും തേൻമാവും, ബ്യൂട്ടിഫുൾ തുടങ്ങി സമാനമായ സബ്‌ജക്ടുകൾ പറഞ്ഞ പടങ്ങളെല്ലാം സ്വീകരിച്ച ആസ്വാദകരാണ് നമ്മുടേത്. അതിലും മികച്ച ഒരു സൃഷ്ടിയാകും 'നാളെ രാവിലെ' എന്ന് പ്രതീക്ഷിക്കാം.
