മമ്മൂട്ടിയും മോഹന്‍‌ലാലും ഒന്നിച്ച ‘ഹരികൃഷ്ണന്‍സ്’ എന്ന ഫാസില്‍ ചിത്രത്തിന്‍റെ സ്വീകരണം എന്തായിരുന്നു എന്ന് കണ്ടവരാണ് മലയാളികള്‍. മമ്മൂട്ടി, മോഹന്ലാല്, സുരേഷ് ഗോപി, പൃഥ്വിരാജ്, ദിലീപ്, മുകേഷ്, ജയറാം എന്നീ നായകന്‍‌മാര്‍ ഒന്നിക്കുമ്പോള്‍ പ്രതീക്ഷ അതിലും വളരും. അഭിനേതാക്കളുടെ സംഘടനയായ അമ്മയുടെ പുതിയ ചിത്രം ട്വന്‍റി ട്വന്‍റിയിലാണ് ഇവര്‍ ഒന്നിക്കുന്നത്.
സൂപ്പര്‍ താരങ്ങള്‍ ഒന്നിക്കുന്നു എന്നതിനു പുറമേ മലയാളത്തിലെയും തമിഴിലെയും സൂപ്പര്‍ നായികമാരും ഈ ചിത്രത്തില്‍ ഒന്നിക്കുന്നു. നയന്‍താര, നവ്യാനായര്‍, കാവ്യാമാധവന്‍, ഭാവന, ഗോപിക നായികമാരുടെ നിര അങ്ങനെ പോകുന്നു. മലയാളത്തിന്‍റെ കഴിഞ്ഞകാല നായകന്‍ മധു മുതല്‍ യുവനായിക ഭാവന വരെ അണിനിരക്കുന്ന ചിത്രത്തില്‍ മലയാളത്തിലെ 50 ല്‍ അധികം മുന്‍നിര താരങ്ങളാണ് അഭിനയിക്കുന്നത്. അമ്മയ്‌ക്ക് വേണ്ടി ദിലീപാണ് ചിത്രത്തിന്‍റെ നിര്‍മ്മാതാവ് വേഷം അണിയുന്നത്.
WD
WD
ആക്ഷന്‍ സിനിമയുടെ രാജാവായ ജോഷി സംവിധാനവും യുവ തിരക്കഥാകൃത്തുകളായ ഉദയ്കൃഷ്ണ- സിബി കെ തോമസ് തിരക്കഥയും തയ്യാറാക്കുന്നു. ഇന്ത്യന്‍ സിനിമയിലെ പ്രതിഭാധനരായ അഭിനേതാക്കളായ മലയാള താരങ്ങള്‍ നിരക്കുന്ന ചിത്രത്തിന്‍റെ രണ്ടാംഘട്ട ചിത്രീകരണം മാര്‍ച്ച് രണ്ടാം വാരം തുടങ്ങി. ആദ്യ ഘട്ടം ഫെബ്രുവരിയില്‍ പൂര്‍ത്തിയായിരുന്നു.
അമ്മയില്‍ നിന്നുള്ള ആദ്യ ചിത്രത്തിന്‍റെ രണ്ടാം ഷെഡ്യൂള്‍ ഏപ്രില്‍ ആദ്യവാരം വരെ നീളും. ഈ ഷെഡ്യൂളില്‍ ചിത്രത്തിന്‍റെ 50 ശതമാനം ജോലികള്‍ പൂര്‍ത്തിയാക്കും. ജൂണില്‍ തീയറ്ററുകളില്‍ എത്തിക്കാനാണ് അണിയറ പ്രവര്‍ത്തകരുടെ നീക്കം. തമിഴിലും തെലുങ്കിലുമായി വെന്നിക്കൊടി പാറിക്കുന്ന നയന്‍ താര തിരിച്ചെത്തുന്നു എന്ന പ്രത്യേകതയും ചിത്രത്തിനുണ്ട്. മനസ്സിനക്കരെയ്‌ക്ക് ശേഷം മലയാളത്തില്‍ നയന്‍റെ ഒരു രണ്ടാം അരങ്ങേറ്റം കൂടിയാണ് ചിത്രം.
മമ്മൂട്ടി അഭിഭാഷകന്‍റെ വേഷത്തിലും സുരേഷ് ഗോപി പൊലീസ് ഓഫീസറുടെ വേഷത്തിലുമാണ് അഞിനയിക്കുന്നത്. മോഹന്‍ലാലിനു ദിലീപിന്‍റെ മൂത്ത സഹോദരന്‍റെ വേഷമാണ്. പി സുകുമാര്‍ ഛായാഗ്രഹണം നിര്‍വ്വഹിക്കുന്ന ചിത്രത്തില്‍ സംഗീത വിഭാഗം കൈകാര്യം ചെയ്യുന്നത് ബേണി ഇഗ്നേഷ്യസാണ്. 2007 ഡിസംബറില്‍ ചിത്രീകരണം ആരംഭിച്ചു.
WD
WD
ജയറാം, മുകേഷ്, മനോജ് കെ ജയന്‍, ബാലചന്ദ്രമേനോന്‍, കലാഭവന്‍ മണി, ഇന്ദ്രജിത്ത്, മധു, ജയസൂര്യ, ജഗതി ശ്രീകുമാര്‍, ഇന്നസെന്‍റ് ഹരിശ്രീ അശോകന്‍, സലിം കുമാര്‍, കൊച്ചിന്‍ ഹനീഫ, മണിയന്‍ പിള്ള രാജു, ഇന്ദ്രന്‍സ്, ക്യാപ്ടന്‍ രാജു, റഹ്‌മാന്‍, ജഗദീഷ്, സിദ്ദിഖ്, ലാല്‍, സായ്‌കുമാര്‍, ബിജു മേനോന്‍, കവിയൂര്‍ പൊന്നമ്മ, സുകുമാരി, നയന്‍ താര, പദ്മപ്രിയ നവ്യാവായര്‍, കാവ്യാ മാധവന്‍, മീരാജാസ്മിന്‍, ഭാവന, സംവൃത, വിമലാരാമന്‍, കല്‍പ്പന അങ്ങനെ പോകുന്നു പ്രമുഖരുടെ നിര.
