ശ്വേതാ മേനോന്‍റെ പ്രസവം ചിത്രീകരിച്ച സിനിമ എന്ന ഖ്യാതി ഇപ്പോള്‍ തന്നെ ‘കളിമണ്ണ്’ എന്ന പ്രൊജക്ടിനെ ശ്രദ്ധാകേന്ദ്രമാക്കിക്കഴിഞ്ഞു. ബ്ലെസിയുടെ ഇതുവരെയുള്ള സിനിമകളേക്കാള്‍ വലിയ മാധ്യമ - പ്രേക്ഷക ശ്രദ്ധയാണ് ഈ സിനിമയ്ക്ക് ലഭിക്കുന്നത്. വിവാദചിത്രമായതിനാല്‍ ഈ സിനിമയുടെ റിലീസ് ഏവരും ആകാംക്ഷയോടെയാണ് കാത്തിരിക്കുന്നത്. ‘കേരളത്തിലെ തിയേറ്ററുകള്‍ ലേബര്‍ റൂമാക്കാന്‍ അനുവദിക്കില്ല’ എന്ന പ്രഖ്യാപനത്തോടെ പ്രമുഖ രാഷ്ട്രീയ പാര്‍ട്ടികളും സാംസ്കാരിക സംഘടനകളും ഇപ്പോള്‍ തന്നെ ചിത്രത്തിനെതിരെ രംഗത്തുണ്ട്.
കളിമണ്ണിന്‍റെ പുതിയ പോസ്റ്റര്‍ റിലീസായിക്കഴിഞ്ഞു. ഗര്‍ഭിണിയായ ശ്വേതയുടെ ചിത്രവുമായാണ് പോസ്റ്റര്‍ എത്തിയിരിക്കുന്നത്. ഈ പോസ്റ്റര്‍ സോഷ്യല്‍ നെറ്റുവര്‍ക്ക് സൈറ്റുകളില്‍ വന്‍ ചര്‍ച്ചാവിഷയമായിരിക്കുകയാണ്.
ഒരു സ്ത്രീ ഗര്‍ഭിണിയായതു മുതല്‍ പ്രസവിക്കുന്നത്‌ വരെയുള്ള കാര്യങ്ങളാണ്‌ സിനിമയില്‍ പറയുന്നത്. ഗര്‍ഭസ്ഥ ശിശുവും അമ്മയും തമ്മിലുള്ള സംഭാഷണങ്ങളാണ് ചിത്രത്തിന്‍റെ ഹൈലൈറ്റ്.
ഒരു പുരാണ കഥയാണ് ഈ സിനിമയുടെ കഥയ്ക്ക് ബ്ലെസിക്ക് പ്രേരണയായത്. അര്‍ജുനന്‍ ഗര്‍ഭിണിയായ പത്നി സുഭദ്രയോട് ചക്രവ്യൂഹത്തേക്കുറിച്ച് വിശദീകരിച്ചുകൊടുത്തത് ഗര്‍ഭസ്ഥശിശുവായ അഭിമന്യു കേട്ടുപഠിച്ചെന്നാണ് മഹാഭാരത കഥ. ചക്രവ്യൂഹത്തില്‍ നിന്ന് എങ്ങനെ പുറത്തുകടക്കണം എന്നതിനെക്കുറിച്ച് അര്‍ജുനന്‍ പറയുന്നതിന് മുമ്പ് സുഭദ്ര ഉറങ്ങിപ്പോയത്രെ. അതുകൊണ്ട് അഭിമന്യുവിന് അത് മനസിലാക്കാന്‍ സാധിച്ചില്ല. കുരുക്ഷേത്രയുദ്ധത്തില്‍ ചക്രവ്യൂഹത്തില്‍ പെട്ട് അഭിമന്യുവിന് വീരമരണം സംഭവിക്കുകയും ചെയ്തു.
അഭിമന്യുവിന്‍റെ ഈ കഥയാണ് ‘ഗര്‍ഭസ്ഥ ശിശു എല്ലാം അറിയുന്നു’ എന്ന സത്യത്തേക്കുറിച്ച് ഒരു സിനിമയെടുക്കാന്‍ ബ്ലെസിയെ പ്രേരിപ്പിച്ചത്. കഥ കേട്ടതോടെ തന്‍റെ ഗര്‍ഭകാലം ഈ സിനിമയ്ക്കായി സമര്‍പ്പിക്കാന്‍ ശ്വേതാ മേനോന്‍ തയ്യാറാവുകയായിരുന്നു.
ബ്ലെസിയുടെ തന്നെ കല്‍ക്കട്ട ന്യൂസ് പോലെ വന്‍ ബജറ്റിലാണ് ‘കളിമണ്ണ്’ ഒരുങ്ങുന്നത് എന്നതാണ് പ്രത്യേകത. ചിത്രത്തിന്‍റെ ഷൂട്ടിംഗ് കൂടുതലും മുംബൈയിലാണ് നടന്നത്. ബിജു മേനോനാണ് നായകന്‍. പ്രമുഖ സംവിധായകനായ പ്രിയദര്‍ശന്‍ ഈ സിനിമയില്‍ അഭിനയിക്കുന്നുണ്ട്. ചിത്രത്തിലെ ഒരു നിര്‍ണായക ഘട്ടത്തില്‍ വഴിത്തിരിവ് സൃഷ്ടിക്കുന്ന സംവിധായകന്‍ പ്രിയദര്‍ശനായിത്തന്നെയാണ് പ്രിയന്‍ വേഷമിടുന്നത്. സുനില്‍ ഷെട്ടിയാണ് ഈ സിനിമയിലെ മറ്റൊരു വലിയ താരം. ‘ഡേര്‍ട്ടി പിക്ചറി’ന്‍റെ കോറിയോഗ്രാഫറായ പോണി വര്‍മ കളിമണ്ണുമായി സഹകരിക്കുന്നുണ്ട്.
വാല്‍ക്കഷണം: വിഖ്യാത ഹംഗേറിയന്‍ സംവിധായിക മാര്‍ത്ത മെസൊറസിന്‍റെ ‘നയന്‍ മന്ത്‌സ്’ എന്ന സിനിമ സമാനമായ പ്രമേയമാണ് ചര്‍ച്ച ചെയ്തത്. ആ ചിത്രത്തില്‍ നായിക ലിലി മൊനൊറിയുടെ യഥാര്‍ത്ഥ ഗര്‍ഭകാലവും പ്രസവവുമാണ് ചിത്രീകരിച്ചത്.
അടുത്ത പേജില്‍ - ആ ചിത്രീകരണത്തെക്കുറിച്ച് ബ്ലെസി വെളിപ്പെടുത്തുന്നു!
PRO
ഇക്കഴിഞ്ഞ സെപ്റ്റംബര്‍ 27ന് മുംബൈ അന്ധേരി വെസ്റ്റിലെ ഡോ.നാനാവതി നഴ്സിംഗ് ഹോമില്‍ വൈകുന്നേരം 5.27നായിരുന്നു ശ്വേതാ മേനോന്‍ ഒരു പെണ്‍കുഞ്ഞിന് ജന്‍‌മം നല്‍കിയത്. മൂന്ന് ക്യാമറകളിലൂടെയാണ് ബ്ലെസി ആ രംഗം ചിത്രീകരിച്ചത്. സതീഷ് കുറുപ്പായിരുന്നു ക്യാമറാമാന്‍. എന്നാല്‍ പ്രസവം ചിത്രീകരിക്കുന്നതിനിടെ തല കറങ്ങിയാലോ എന്ന് ഭയന്ന് സതീഷ് കുറുപ്പ് മാറിനിന്നു. പകരം പ്രസവമുറിയില്‍ ക്യാമറ കൈകാര്യം ചെയ്തത് ജിബു ജേക്കബ്!
“ഡോക്ടര്‍മാര്‍ കണക്കുകൂട്ടി പറഞ്ഞതിനേക്കാള്‍ 10 ദിവസം മുമ്പായിരുന്നു പ്രസവം. ഒരാഴ്ച മുമ്പുതന്നെ ഞങ്ങളും ആശുപത്രിയില്‍ ശ്വേതയുടെ അടുത്ത മുറിയില്‍ അഡ്മിറ്റായിരുന്നു. ആ സമയത്ത് പ്രസവമുറിയെക്കുറിച്ച് പഠിക്കുകയായിരുന്നു. പ്രസവമുറിയിലെ ഡോക്ടര്‍മാരുടെയും നഴ്സുമാരുടെയും ചലനങ്ങള്‍, അവരുടെ സ്ഥാനങ്ങള്‍. ആ മുറിയിലെ അന്തരീക്ഷം. എല്ലാം കൃത്യമായി സ്കെച്ചുചെയ്തെടുത്തു. അതിനനുസരിച്ച് ക്യാമറകള്‍ വയ്ക്കേണ്ട സ്ഥാനങ്ങള്‍ നിശ്ചയിച്ചു. മൂന്ന് ക്യാമറകളിലൂടെയാണ് പ്രസവവും ശ്വേതയുടെ റിയാക്ഷനുകളും പകര്‍ത്തിയത്. ഏകദേശം 20 മിനിറ്റിലേറെ പ്രസവം ചിത്രീകരിച്ചു. ശ്വേത മകളുടെ നെറ്റിയില്‍ ഉമ്മവയ്ക്കുന്ന രംഗത്തോടെയാണ് ചിത്രീകരണം പൂര്‍ത്തിയാക്കിയത്” - മനോരമ ആഴ്ചപ്പതിപ്പിന് അനുവദിച്ച അഭിമുഖത്തില്‍ ബ്ലെസി പറയുന്നു.
“ശ്വേതയുടേത് ഒരു സ്വാഭാവിക പ്രസവമായിരുന്നില്ലെങ്കില്‍ ഈ സിനിമയുടെ സ്വഭാവം തന്നെ മറ്റൊന്നായി മാറിയേനെ. എന്നോടൊപ്പം, എനിക്കു നിഴലായി, ഛായയായി ഈശ്വരന്‍റെ സ്പര്‍ശമുണ്ടെന്ന് ഞാന്‍ കരുതുന്നു. ഈശ്വരനെ ഞാന്‍ കണ്ടെത്തുന്നത്, തിരിച്ചറിയുന്നത്, ഞാന്‍ ഒരു കലാകാരനാണെന്ന തിരിച്ചറിവുണ്ടായത് അപ്പോഴാണ്” - ഈ അഭിമുഖത്തില്‍ ബ്ലെസി വ്യക്തമാക്കുന്നു.
