പ്രേക്ഷക മനസ്സിനെ അറിഞ്ഞ് അഭിനയിക്കാന്‍ ദിലീപിനൊരു മിടുക്കുണ്ട്. ദിലീപിന്‍റെ അഭിനയ ശേഷിയെ മുതലാക്കുന്ന ഒരു സിനിമയായിരിക്കും അണിയറയില്‍ ഒരുങ്ങിക്കൊണ്ടിരിക്കുന്ന “മുല്ല”. ഈ ചിത്രത്തില്‍ മുല്ല എന്ന എന്തിനും പോന്ന ഒരു ചെറുപ്പക്കാരനെയാണ് ദിലീപ് അവതരിപ്പിക്കുന്നത്.
വര്‍ഷങ്ങള്‍ക്ക് മുമ്പ് കാരക്കാട് കോളനിയിലേക്ക് അപരിചിതയായ ഒരു ഗര്‍ഭിണി എത്തി. കാമുകന്‍ നല്‍കിയ വഞ്ചനയുടെ ബാക്കിപത്രമായിരുന്നു അവളുടെ വയറ്റില്‍ വളരുന്നത്. കോളനിക്കാരോടൊപ്പം അവളും അവിടെ ജീവിതം തുടങ്ങി.
WD
WD
പിടിച്ചുപറിക്കാരുടെയും ക്രിമിനലുകളുടെയും ആ കോളനിയില്‍ അവള്‍ ജീവിതമാര്‍ഗ്ഗമായി വേശ്യാവൃത്തി സ്വീകരിച്ചു. തലയില്‍ മുല്ലപ്പൂ ചൂടിയെത്തുന്ന അവളെ “മുല്ല” എന്ന പേരിലാണ് കോളനിക്കാര്‍ വിളിച്ചത്. മകന് ജനിച്ച ശേഷം മുല്ല ആത്മഹത്യ ചെയ്യുന്നു.
മുല്ലയുടെ മകന് പ്രത്യേക പേരൊന്നും ഇല്ലാതിരുന്നതിനാല്‍ അവനെയും കോളനിക്കാര്‍ മുല്ല എന്ന് തന്നെ വിളിച്ചു. മുല്ലയും കോളനിക്കാരുടെ തൊഴില്‍ തന്നെ സ്വീകരിച്ചു, പിടിച്ചു പറിയും കൂലിത്തല്ലും!
മുടി പറ്റെ വെട്ടി കൈലിയും മടക്കി കുത്തി നില്‍ക്കുന്ന മുല്ലയെ ആദ്യമായി കാണുമ്പോള്‍ തന്നെ ആളല്‍പ്പം പിശകാണെന്ന് മനസ്സിലാവും. കോളനിക്കരികിലൂടെ പോവുന്ന മീറ്റര്‍ഗേജ് ട്രയിനാണ് മുല്ലയുടെ കൂട്ടുകാരുടെയും പ്രധാന പ്രവര്‍ത്തന മേഖല! കോളനിക്കരികിലെത്തുമ്പോള്‍ ചങ്ങല വലിച്ച് ട്രെയിന്‍ നിര്‍ത്തുന്നത് സ്ഥിരം പരിപാടിയാണ്.
ഈ ട്രെയിനില്‍ വച്ച് നഗരത്തിലെ ബേക്കറിയില്‍ ജോലിക്ക് പോവുന്ന ലക്ഷ്മിയെ മുല്ല പരിചയപ്പെടാനിടയാവുന്നു. തന്നില്‍ മുല്ലപ്പൂവിന്‍റെ പരിമളവും മൃദുത്വവും ഉണ്ടെന്ന് മുല്ലതന്നെ തിരിച്ചറിയുന്ന നിമിഷങ്ങളാണ് പിന്നീട്. ഭൂരിഭാഗവും ട്രെയിനിന്‍റെ പശ്ചാത്തലത്തില്‍ നിര്‍മ്മിക്കുന്ന മുല്ല സംവിധാനം ചെയ്യുന്നത് വ്യത്യസ്തതയുടെ സംവിധായകനായ ലാല്‍ ജോസാണ്.
ഏഷ്യാനെറ്റ് അവതാരകയായിരുന്ന പ്ലസ് ടു വിദ്യാര്‍ത്ഥിനി, മീരാ നന്ദനാണ് ലക്ഷ്മിയായി വേഷമിടുന്നത്. മുല്ലയായുള്ള ദിലീപിന്‍റെ വേഷപ്പകര്‍ച്ച ശ്രദ്ധിക്കപ്പെടുമെന്നു തന്നെയാണ് അണിയറ പ്രവര്‍ത്തകരുടെ വിശ്വാസം.
WD
WD
ബിജു മേനോന്‍, സലിംകുമാര്‍, സൈജു കുറുപ്പ്, അനൂപ് ചന്ദ്രന്‍, റിസബാവ, ഉണ്ടപ്പക്രു, പ്രശാന്ത്, സുധീര്‍, സുബീഷ് സുധി, ശിവജി ഗുരുവായൂര്‍, ശ്രുതിനായര്‍, റീന ബഷീര്‍, സുകുമാരി, ലീലാ ഹരി, വനിത തുടങ്ങിയവരും മുല്ലയില്‍ അഭിനയിക്കുന്നു. തിരക്കഥ, സംഭാഷണം എം. സിന്ധുരാജ് .സാഗര്‍ ബാലാജി ക്രിയേഷന്‍സിന്‍രെ ബാനറില്‍ സാഗര്‍ ഷെരീഫ്, സുന്ദര്‍ രാജ് എന്നിവര്‍ ചേര്‍ന്ന് നിര്‍മിക്കുന്ന 'മുല്ല' ഏപ്രിലില്‍ തിയേറ്ററുകളില്‍ എത്തും.
