ഫെഫ്കയിലെ അനീതിക്കെതിരെ നിരാഹാര സമരം നടത്തുന്ന വനിതാ തൊഴിലാളികൾക്ക് പിന്തുണയുമായി നടി റിമ കല്ലിങ്കൽ. തങ്ങളുടെ അവകാശങ്ങൾക്കായി ശബ്ദമുയർത്തിയതിനാണ് ഇവർ സസ്പെൻഡ് ചെയ്യപ്പെട്ടതെന്ന് റിമ കല്ലിങ്കൽ സോഷ്യൽ മീഡിയ പോസ്റ്റിലൂടെ പറഞ്ഞു. മുഖ്യമന്ത്രിയുടെ ഓഫീസ്, പിണറായി വിജയൻ, സിപിഎം നേതാവ് കെ.കെ ശൈലജ എന്നിവരെ ടാഗ് ചെയ്തുകൊണ്ടാണ് റിമയുടെ പോസ്റ്റ്.
'മലയാള ചലച്ചിത്ര മേഖലയിലെ സ്ത്രീകൾ, ഹെയർ സ്റ്റൈലിസ്റ്റ് യൂണിയന്റെ ഭാഗമായവർ. ജോലി ചെയ്യാനും വിയോജിപ്പ് പ്രകടിപ്പിക്കാനും മേക്കപ്പ് മേധാവിമാരിൽ നിന്ന് സ്വതന്ത്രരാകാനും മേക്കപ്പ് മേധാവിമാരായി ജോലി ചെയ്യാനും അതിക്രമങ്ങളില്ലാത്ത സുരക്ഷിതമായ അന്തരീക്ഷത്തിൽ ജോലി ചെയ്യാനുമെല്ലാമുള്ള അവകാശം ചോദിക്കുന്നു. എന്നാൽ ശബ്ദമുയർത്തിയതിന് ഇവർ സസ്പെൻഡ് ചെയ്യപ്പെട്ടു. ഉറക്കെ സംസാരിച്ചതിന് മാറ്റിനിർത്തപ്പെട്ടു. കമ്യൂണിസ്റ്റ് കേരളത്തിലെ 2025-ലെ വനിതാ തൊഴിലാളികളാണ് ഇവർ', എന്നാണ് നടി കുറിച്ചിരിക്കുന്നത്.
