കഴിഞ്ഞ 24 മണിക്കൂറിനിടെ പവി കെയര്‍ ടേക്കറിന്റെ 34,000 ടിക്കറ്റുകളാണ് വിറ്റു പോയിരിക്കുന്നത്. റിലീസ് ചെയ്തു 17-ാം ദിവസത്തിലേക്ക് എത്തിയ ആവേശത്തിന്റേതായി പവി കെയര്‍ ടേക്കറിന്റെ ഇരട്ടിയിലേറെ ടിക്കറ്റുകളാണ് ബുക്ക് മൈ ഷോയില്‍ വിറ്റു പോയിരിക്കുന്നത്.
അയാള്‍ ഞാനല്ല, ഡിയര്‍ ഫ്രണ്ട് എന്നീ സിനിമകള്‍ക്ക് ശേഷം നടന്‍ കൂടിയായ വിനീത് കുമാര്‍ സംവിധാനം ചെയ്ത ചിത്രമാണ് പവി കെയര്‍ ടേക്കര്‍. ദിലീപ് തന്നെയാണ് പവി കെയര്‍ ടേക്കര്‍ നിര്‍മിക്കുന്നത്. രാജേഷ് രാഘവന്റേതാണ് കഥ. ഒരു ഫ്‌ളാറ്റിന്റെ കെയര്‍ ടേക്കറായാണ് ദിലീപ് വേഷമിടുന്നത്.
ആദ്യ ഷോ കഴിഞ്ഞപ്പോള്‍ ചിത്രത്തിനു ശരാശരി അഭിപ്രായങ്ങളാണ് ലഭിച്ചത്. ഔട്ട്ഡേറ്റഡ് ആയ തമാശകളാണ് സിനിമയെ ശരാശരിയില്‍ ഒതുക്കിയതെന്ന് ആദ്യ ഷോ കഴിഞ്ഞ ശേഷം നിരവധി പ്രേക്ഷകര്‍ പ്രതികരിച്ചു. ആവേശം, വര്‍ഷങ്ങള്‍ക്കു ശേഷം, ആടുജീവിതം എന്നീ സിനിമകള്‍ ഇപ്പോഴും മികച്ച രീതിയില്‍ പ്രദര്‍ശനം തുടരുന്നതിനാല്‍ പവി കെയര്‍ ടേക്കര്‍ ബോക്സ്ഓഫീസില് വലിയ വിജയമാകാനും സാധ്യതയില്ല.
' നാടകീയത കലര്‍ന്ന രംഗങ്ങളും പ്രേക്ഷകരെ പിടിച്ചിരുത്താന്‍ കഴിയാത്ത തമാശകളുമാണ് ചിത്രത്തിലുള്ളത്. ദിലീപിന്റെ ചില നേരത്തെ പ്രകടനങ്ങള്‍ മാത്രമാണ് ആശ്വാസം. തിയറ്ററില്‍ വിജയമാകാന്‍ സാധ്യതയില്ല,' മറ്റൊരു പ്രേക്ഷകന്‍ അഭിപ്രായപ്പെട്ടു. സമീപകാലത്ത് വന്നതില്‍ അല്‍പ്പമെങ്കിലും ഭേദപ്പെട്ട ദിലീപ് സിനിമയെന്നാണ് മറ്റു ചില പ്രേക്ഷകരുടെ അഭിപ്രായം.
