കൈയടികള്‍ വാരിക്കൂട്ടി ഗോട്ടിലെ ധോണിയുടെ 'അതിഥി വേഷം'; കാര്യം നിസാരം

Vijay and Dhoni - GOAT film

വെങ്കട് പ്രഭു ചിത്രം ഗോട്ടും ഇളയദളപതി വിജയിയും സോഷ്യല്‍ മീഡിയയില്‍ വൈറലായിരിക്കുകയാണ്. ഇന്ന് റിലീസ് ചെയ്ത ചിത്രത്തിനു സമ്മിശ്ര പ്രതികരണങ്ങളാണ് ലഭിക്കുന്നതെങ്കിലും തിയറ്ററുകളില്‍ ടിക്കറ്റ് കിട്ടാനില്ലാത്ത അവസ്ഥയാണ്. ഇന്ത്യയുടെ ലോകകപ്പ് ഹീറോ മഹേന്ദ്രസിങ് ധോണിയും ഗോട്ടില്‍ അഭിനയിച്ചിട്ടുണ്ടത്രേ..! ഗോട്ടിന്റെ ആദ്യ ഷോ കഴിഞ്ഞതോടെ ധോണിയും സോഷ്യല്‍ മീഡിയയില്‍ നിറഞ്ഞുനില്‍ക്കുകയാണ്. 

ഐപിഎല്ലില്‍ ചെന്നൈ സൂപ്പര്‍ കിങ്‌സിനു വേണ്ടി ധോണി കളത്തിലിറങ്ങുന്ന ദൃശ്യങ്ങളാണ് ഗോട്ടില്‍ ഏതാനും സെക്കന്‍ഡുകള്‍ കാണിക്കുന്നത്. അല്ലാതെ ധോണി ഈ സിനിമയില്‍ അഭിനയിച്ചിട്ടില്ല ! ഡ്രസിങ് റൂമില്‍ നിന്ന് ധോണി ബാറ്റ് ചെയ്യാന്‍ ഇറങ്ങിവരുന്ന ഭാഗമാണ് സിനിമയില്‍ കാണിക്കുന്നത്. ഈ സമയത്ത് ഇളയദളപതി വിജയിയേയും കാണിക്കുന്നുണ്ട്. വലിയ ആരവത്തോടെയാണ് ഈ രംഗങ്ങളെ വിജയ്, ധോണി ആരാധകര്‍ സ്വീകരിച്ചത്. 

അതേസമയം പ്രതീക്ഷയ്‌ക്കൊത്തു ഉയരാന്‍ ഗോട്ടിനു സാധിച്ചില്ലെന്നാണ് സോഷ്യല്‍ മീഡിയ പ്രതികരണം. 'വിജയ് എന്ന സൂപ്പര്‍ താരത്തിന്റെ പ്രകടനം കൊണ്ട് മാത്രം ഗോട്ട് രക്ഷപ്പെടുന്നില്ല. ശരാശരിയില്‍ ഒതുങ്ങിയ ആദ്യ പകുതി പ്രേക്ഷകരെ മുഷിപ്പിക്കുന്നു. തിരക്കഥയാണ് സിനിമയ്ക്കു തിരിച്ചടിയായത്,' ഒരു പ്രേക്ഷകന്‍ സോഷ്യല്‍ മീഡിയയില്‍ കുറിച്ചു. ചില ആക്ഷന്‍ രംഗങ്ങള്‍ ഒഴികെ മറ്റൊന്നും എടുത്തുപറയാനില്ലെന്നും കണ്ടുശീലിച്ച തമിഴ് പടങ്ങളുടെ ടെംപ്ലേറ്റ് തന്നെയാണെന്നും മറ്റൊരു പ്രേക്ഷകന്‍ എക്സ് പ്ലാറ്റ്ഫോമില്‍ അഭിപ്രായപ്പെട്ടിരിക്കുന്നു. ദളപതിയുടെ പ്രകടനം മാത്രം കാണാന്‍ ടിക്കറ്റെടുക്കാമെന്ന് പറയുന്നവരും ഉണ്ട്.