സിനിമയിൽ വന്നശേഷം മോശം അനുഭവം ഉണ്ടായിട്ടുണ്ടെന്ന് മുൻപ് പല നടിമാരും തുറന്നു പറഞ്ഞിരുന്നു. സിനിമയുടെ തുടക്കകാലത്ത് തനിക്കും ലൈംഗികചൂഷകരെ നേരിടേണ്ടി വന്നിട്ടുണ്ടെന്ന് നടിയും രാഷ്ട്രീയപ്രവര്‍ത്തകയുമായ ഖുശ്ബു സുന്ദര്‍. സിനിമാ മേഖലയില്‍ മാത്രമല്ല, എല്ലായിടങ്ങളിലും സ്ത്രീകള്‍ ചൂഷണത്തിന് ഇരയാകുന്നുണ്ടെന്നും ഖുശ്ബു തുറന്നു പറയുന്നു.
തങ്ങൾക്ക് നേരെ ഉണ്ടാകുന്ന ഇത്തരം മോശം അനുഭവങ്ങൾക്കെതിരെ അപ്പോള്‍ തന്നെ പ്രതികരിക്കണം എന്നും ഖുശ്ബു പറഞ്ഞു. ഗോവയില്‍ നടക്കുന്ന ഇന്റര്‍നാഷണല്‍ ഫിലിം ഫെസ്റ്റിവല്‍ ഓഫ് ഇന്ത്യ 2024 (ഐ.എഫ്.എഫ്.ഐ.) ഭാഗമായി നടത്തിയ 'വുമണ്‍ സേഫ്റ്റി ഇന്‍ സിനിമ' എന്ന സെഷനില്‍ സംസാരിക്കുന്നതിനിടയിലാണ് ഖുശ്ബുവിന്റെ വെളിപ്പെടുത്തല്‍.
ഒരു നായകന്‍ ഒരിക്കല്‍, 'ആരും അറിയാതെ എനിക്ക് ഒരു അവസരം തരാമോ' എന്ന് ചോദിച്ചുവെന്നും ഖുശ്ബു. അതിന് നിങ്ങള്‍ക്ക് ഇവിടെവെച്ച് രഹസ്യമായി അടി കൊള്ളണോ അതോ മുഴുവന്‍ യൂണിറ്റിന്റെയും മുന്നില്‍വെച്ച് കൊള്ളണോ എന്നാണ് മറുപടി നൽകിയതെന്നും ഖുശ്ബുവിന്റെ വെളിപ്പെടുത്തൽ. ആ സമയത്ത് താന്‍ ഒരു പുതിയ നടിയാണെന്നോ, ഇതെന്റെ സിനിമാ ഭാവിയെ ബാധിക്കുമോ എന്നൊന്നും താന്‍ ചിന്തിച്ചില്ല. പ്രതികരിക്കുകയാണ് ചെയ്തതെന്നും ഖുശ്ബു.
