വെല്ലുവിളി ഏറ്റെടുക്കാം, ഇരുപതാം നൂറ്റാണ്ട് വീണ്ടും ചെയ്യാം: കെ മധു
ബുധന്‍, 27 ജൂണ്‍ 2012 (15:10 IST)
PRO
1987ല്‍ കെ മധു സംവിധാനം ചെയ്ത ചിത്രമാണ് ‘ഇരുപതാം നൂറ്റാണ്ട്’. മലയാള സിനിമ അതുവരെ കണ്ടിരുന്ന ആക്ഷന്‍ സിനിമകളില്‍ നിന്ന് വ്യത്യസ്തമായ പരീക്ഷണമായിരുന്നു അത്. എസ് എന്‍ സ്വാമി രചിച്ച ചിത്രത്തില്‍ മോഹന്ലാലിന്റെ സാഗര്‍ എലിയാസ് ജാക്കി എന്ന കഥാപാത്രം തരംഗമായി മാറി.
ഈ സിനിമ അക്കാലത്ത് ഒരു ബിഗ് ബജറ്റ് ചിത്രമായിരുന്നു. 40 ലക്ഷം രൂപയാണ് ചെലവായത്. നാലരക്കോടി രൂപയാണ് ഇരുപതാം നൂറ്റാണ്ട് തിയേറ്ററുകളില്‍ നിന്ന് വാരിക്കൂട്ടിയത്. ഇരുപതാം നൂറ്റാണ്ടിന്‍റെ രണ്ടാം ഭാഗമായ ‘സാഗര്‍ എലിയാസ് ജാക്കി റീലോഡഡ്’ എന്ന ചിത്രം പക്ഷേ പരാജയമായി. കെ മധുവിന് പകരം അമല്‍ നീരദായിരുന്നു ചിത്രം സംവിധാനം ചെയ്തത്.
മോഹന്‍ലാലും എസ് എന്‍ സ്വാമിയും റെഡിയാണെങ്കില്‍ ‘ഇരുപതാം നൂറ്റാണ്ട്’ വീണ്ടും ചെയ്യാന്‍ താന്‍ തയ്യാറാണ് എന്നാണ് കെ മധു പ്രഖ്യാപിച്ചിരിക്കുന്നത്. വളരെ ഇന്‍ററസ്റ്റിംഗായ ഈ പ്രഖ്യാപനം സണ്‍‌ഡേ മംഗളത്തിന് വേണ്ടി പല്ലിശേരിക്ക് അനുവദിച്ച അഭിമുഖത്തിലാണ് കെ മധു നടത്തിയത്.
“ഇരുപതാം നൂറ്റാണ്ട് വീണ്ടും ചെയ്യാന്‍ സമ്മതിക്കേണ്ടത്‌ എസ് എന്‍ സ്വാമിയാണ്‌. സ്വാമി എഴുതിത്തന്നാല്‍ ഞാന്‍ എടുക്കാന്‍ തയാറാണ്‌. മോഹന്‍ലാല്‍ അഭിനയിക്കാന്‍ സമ്മതിച്ചാല്‍ നായകവേഷം ചെയ്യുന്നതു മോഹന്‍ലാല്‍ തന്നെയായിരിക്കും. ഈ വെല്ലുവിളി ഞാന്‍ സ്വീകരിച്ചിരിക്കുകയാണ്. ഇരുപതാം നൂറ്റാണ്ട് എസ് എന്‍ സ്വാമി എഴുതി മോഹന്‍ലാല്‍ അഭിനയിക്കുകയാണെങ്കില്‍ മറ്റൊരു സൂപ്പര്‍ ഹിറ്റ് സിനിമ നല്‍കാന്‍ എനിക്കു കഴിയും. ഇരുപതാം നൂറ്റാണ്ടില്‍ മോഹന്ലാലിന്റെ കോണ്‍ട്രിബ്യൂഷന്‍ വളരെ വലുതായിരുന്നു. ഇനിയും മോഹന്‍ലാലില്‍ നിന്ന് എന്തൊക്കെ കിട്ടുമെന്ന്‌ എനിക്കറിയാം. അതു കൊണ്ടാണ്‌ ഞാന്‍ ഉറപ്പ്‌ പറയുന്നത്” - കെ മധു വ്യക്തമാക്കുന്നു.
അടുത്ത പേജില്‍ - അടുത്തത് സി ബി ഐ, അത്ഭുതങ്ങള്‍ കാത്തിരിക്കുന്നു!
PRO
ഇപ്പോള്‍ ‘ബാങ്കിംഗ് അവേഴ്സ് 10 ടു 4’ എന്ന ചിത്രം സംവിധാനം ചെയ്തുകൊണ്ടിരിക്കുകയാണ് കെ മധു. എളുപ്പം പണം സമ്പാദിക്കുന്നതിനുവേണ്ടി കൃത്രിമ മാര്‍ഗം സ്വീകരിച്ച ഒരു സംഘം ചെറുപ്പക്കാരുടെ കഥയാണിത്. അവര്‍ നടത്തുന്ന ഒരു ബാങ്ക്‌ കൊള്ളയുടെ കഥ. രാവിലെ 10 മണി മുതല്‍ വൈകിട്ട്‌ നാലു മണി വരെയുള്ള സമയത്തിനുള്ളിലാണ്‌ കഥ നടക്കുന്നത്‌.
കെ മധു അടുത്തതായി ചെയ്യുന്നത് സി ബി ഐ സീരീസിലെ അഞ്ചാം ഭാഗമാണ്. എസ് എന്‍ സ്വാമി തിരക്കഥ പൂര്‍ത്തിയാക്കിക്കഴിഞ്ഞു. മമ്മൂട്ടി വീണ്ടും സേതുരാമയ്യരാകുന്നു.
“മമ്മൂട്ടിയുടെ തിരക്കു കൊണ്ടു മാത്രമാണ്‌ അഞ്ചാം ഭാഗം നീണ്ടുപോകുന്നത്‌. എസ് എന്‍ സ്വാമി തിരക്കഥ ഏകദേശം പൂര്‍ത്തിയാക്കിക്കഴിഞ്ഞു. ഞാനിപ്പോള്‍ ചെയ്‌തു കൊണ്ടിരിക്കുന്ന സിനിമ പെട്ടെന്നു പ്ലാന്‍ ചെയ്‌തതാണ്‌. സി ബി ഐ ഡയറിക്കുറിപ്പിന്‍റെ അഞ്ചാം ഭാഗം നീണ്ടുപോകുമെന്ന്‌ തോന്നിയപ്പോഴാണ്‌ പുതിയ സിനിമ ചെയ്തത്” - കെ മധു വ്യക്തമാക്കി.
സി ബി ഐ സീരീസിലെ അഞ്ചാം ഭാഗം വരുമ്പോള്‍ അത് ഒരു റെക്കോര്‍ഡാകുമെന്നാണ് സൂചന. ഒരു നടന്‍ തന്‍റെ കഥാപാത്രമായി പതിറ്റാണ്ടുകളുടെ ഇടവേളയ്ക്ക് ശേഷവും അഭിനയിച്ചുകൊണ്ടേയിരിക്കുന്നത് സാധാരണ സംഭവമല്ലല്ലോ. മമ്മൂട്ടി സേതുരാമയ്യരായി അഞ്ചാം തവണയെത്തുമ്പോള്‍ അത് ലോക റെക്കോര്‍ഡായി മാറുമെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.
