ആചാരങ്ങൾ പല സംസ്ഥാനങ്ങളിലും പലതാണെങ്കിലും, തേച്ചു കുളിയും പുതുവസ്ത്രങ്ങൾ ധരിക്കുന്നതും പരസ്പരം സമ്മാനങ്ങൾ കൊടുക്കുന്നതും എല്ലായിടത്തും പതിവാണ്. അതിനൊരു മാറ്റവുമില്ല. ദീപാവലിയുടെ ഐതീഹ്യത്തിന് പ്രാദേശിക ഭേദമുണ്ട്. ഉത്തരേന്ത്യയില്‍ ദീപാവലി ആഘോഷം അഞ്ച് നാളുകള്‍ നീളുന്നുവെങ്കില്‍ ദക്ഷിണേന്ത്യയില്‍ ദീപാവലി ആഘോഷം പ്രധാനമായും ഒരു ദിവസം മാത്രമേയുള്ളൂ.
തിന്മയ്ക്ക് മേൽ നന്മയുടെ വിജയദിവസം ആഘോഷിക്കാതിരിക്കാൻ ഇന്ത്യയിലെ ജനങ്ങൾക്കാകില്ല. ദക്ഷിണേന്ത്യയിൽ ദീപാവലി ആഘോഷിക്കാത്തവരും ഉണ്ട്. മലയാളികളുടെ ഉത്സവം അന്നും ഇന്നും ഓണം ആയതുകൊണ്ടാണോ എന്തോ, ദീപാവലിക്ക് വേണ്ടത്ര പ്രാധാന്യം കേരളത്തിൽ ഇല്ല എന്ന് വേണം കരുതാൻ.
ദീപാവലി സ്വീറ്റ്സ്, പടക്കം പൊട്ടിക്കൽ, പ്രത്യേക ഭക്ഷണങ്ങൾ ഉണ്ടാക്കൽ ഇതെല്ലാം കേരളത്തിനേക്കാൾ തമിഴ്നാട്ടിലും ആന്ധ്രയിലും കർണാടകയിലും ആണെന്നത് വസ്തുത. കേരളത്തിൽ തീർത്തും ഇല്ലെന്നല്ല, ഓണം പോലെ പ്രധാനപ്പെട്ട ഒരു ആഘോഷമായി കാണുന്നില്ലെന്നാണ്.
