അന്തര്‍ദ്ദേശീയ തിയേറ്റര്‍ ഇന്‍സ്റ്റിറ്റിട്ട്യൂട്ട് (ഐ ടി ഐ ) ആണ് ലോകനാടക ദിനം കൊണ്ടാടുന്നത്. ലോക നാടകദിന സന്ദേശമാണ് ഈ ദിവസത്തെ പ്രധാന ഇനം.
ലോകനേതാക്കളില്‍ ഒരാള്‍ അരങ്ങ് സാംസ്കാരിക വികസനത്തിന് എന്ന വിഷയത്തെ കുറിച്ച് അന്ന് ലോക ജനതക്ക് സന്ദേശം നല്‍കും. 1962 ല്‍ ഫ്രാന്‍സിലെ ജീന്‍ കോക്ടേവൂ ആണ് പ്രഥമ നാടക ദിന സന്ദേശം നല്‍കിയത്.
2007 ല്‍ ഷാര്‍ജയിലേ ഭരണാധികാരി സുല്‍ത്താന്‍ ബിന്‍ മുഹമ്മദ് അല്‍ ക്വാസിമിയാണ് നാടക ദിന സന്ദേശം നല്‍കുന്നത്.
പാരിസിലെ സഫ്രന്‍ അവന്യൂവിലെ യുനെസ്കോ ആസ്ഥാനത്ത് 27 ന് വൈകീട്ട് 7 മണിക്ക് സന്ദേശം വായിക്കല്‍ ചടങ്ങ് നടക്കും.
2006 മെയ് 22 മുതല്‍ 28 വരെ ഫിലിപ്പൈന്‍സിലെ മനിലയില്‍ ഐ ടി ഐയുടെ 31 കാം ലോക സമ്മേളനവും വിവിധ രാജ്യങ്ങള്‍ പങ്കെടുത്ത തിയേറ്റര്‍ ഒളിമ്പിക്സും നടന്നിരുന്നു
1961 ജൂണില്‍ ആദ്യം ഹെല്‍സിങ്കിയിലും പിന്നീട് വിയെന്നയിലുമായി ലോക നാടക വേദിയുടെ ഒന്മ്പതാമത് കണ്‍വെന്‍ഷന്‍ നടന്നു. അന്ന് നാടകവേദിയുടെ പ്രസിഡന്റായ ആര്‍.വി. കിവിമയുടെ നിര്‍ദേശമാണ് 'ലോക നാടകദിനം" എന്ന ആശയം.
അങ്ങനെയാണ് എല്ലാ വര്‍ഷവും മാര്‍ച്ച് 27 ലോക നാടകദിനമായി ആചരിച്ചു വരുന്നത്.
രംഗകലയെപ്പറ്റിയുളള സമഗ്രമായ അറിവുകള്‍ സമാഹരിക്കാന്‍ പറ്റിയ വേദിയാണ് ലോക നാടകദിനം. സൃഷ്ടിപരമായ ദര്‍ശനങ്ങളുടെ പങ്കുവെയ്ക്കല്‍ ഈ നാടകദിനാഘോഷങ്ങളുടെ പ്രധാനലക്ഷ്യമാണ്.
നടന സൗകുമാര്യങ്ങളുടെ പുതിയ വഴികളും, കാഴ്ചപ്പാടുകളുമാണ് എന്നും ലോക നാടകദിനത്തെ സജീവമാക്കുന്നത്.
സര്‍ക്കാര്‍ ചുമതലയിലല്ലാതെ യുനെസയുമായി സഹകരിക്കുന്ന ഏറ്റവും പ്രധാനപ്പെട്ട സാംസ്കാരിക കേന്ദ്രമായി ലോക നാടകവേദി മാറിയിരിക്കുന്നു.
എല്ലാവര്‍ഷവും എല്ലാ മേഖലകളിലുമുണ്ടാകുന്ന പ്രതിഭകളുടെ സംഗമം ഈ നാടക ദിനത്തോടനുബന്ധിച്ച് നടത്തുന്നു. ഈ സംഗമത്തില്‍ ലോകത്തോടുള്ള അവരുടെ പ്രതികരണം പ്രതിഫലിക്കുന്നു.
ലോക നാടക ദിനത്തിന്റെ സന്ദേശം 20 ലധികം ഭാഷകളിലായി പ്രചരിപ്പിക്കാറുണ്ട്. നൂറു കണക്കിന് റേഡിയോ ടെലിവിഷന്‍ സെന്ററുകള്‍ ഈ സന്ദേശം ലേകമെമ്പാടുമെത്തിക്കും. നൂറു കണക്കിന് ദിനപത്രങ്ങളിലൂടെയും സന്ദേശം പ്രചരിപ്പിക്കും.
നാടകകലയുടെ ശക്തിയും സൗന്ദര്യവും വിളിച്ചോതുന്ന ആഘോഷമായി നാടകദിനം മാറിക്കഴിഞ്ഞു. കലാകാരന്മാര്‍ക്ക് അവരുടെ പ്രേക്ഷകരുമായി നേരിട്ട് സംവദിക്കാ?ള്ള അവസരം കൂടിയാണ് ലോക നാടക ദിനത്തിലൂടെ സൃഷ്ടിക്കപ്പെടുന്നത്.
ലോകത്തിന്‍റെ എല്ലാ ഭാഗത്തും നാടക ദിനത്തോടനുബന്ധിച്ച് കലാ-സാംസ്കാരിക പരിപാടികള്‍ സംഘടിപ്പിക്കും. ഉഗാണ്ടയില്‍ ഇക്കുറി രാജ്യത്തെ നാടകപ്രവര്‍ത്തനങ്ങളുടെ 50 വാര്‍ഷികം ആഘോഷിക്കുകയാണ്.27നാണ് ഇതിന്റെ സമാപനം.
