കേരള കോണ്‍ഗ്രസ് മാണി വിഭാഗം പിളര്‍പ്പിലേക്കെന്ന് സൂചന. പാര്‍ട്ടിക്കുള്ളില്‍ അഭിപ്രായ ഭിന്നത ശക്തമായി. മുന്നണി ബന്ധം പാര്‍ട്ടിക്ക് അനിവാര്യമാണെന്ന അഭിപ്രായത്തിലാണ് ജോസഫ് വിഭാഗം. പി ജെ ജോസഫും മോന്‍സ് ജോസഫും അക്കാര്യം തുറന്നുപറയുകയും ചെയ്തു. എന്നാല്‍ മുന്നണിബന്ധം തല്‍ക്കാലം ആവശ്യമില്ലെന്ന ഉറച്ച നിലപാടിലാണ് കെ എം മാണി.
എന്‍ ഡി എ മുന്നണിയുമായി അടുക്കുന്നതിനോട് ജോസഫ് വിഭാഗം ഒട്ടും യോജിക്കുന്നില്ല. അക്കാര്യം മോന്‍സ് ജോസഫ് ഉള്‍പ്പടെയുള്ളവര്‍ തുറന്നുപറയുകയും ചെയ്യുന്നു. ജോസ് കെ മാണിക്ക് കേന്ദ്രമന്ത്രിയാകാന്‍ താല്‍പ്പര്യമുണ്ടെങ്കില്‍ അക്കാര്യം ബി ജെ പി നേതൃത്വവുമായി ചര്‍ച്ച ചെയ്യുമെന്ന ബി ഡി ജെ എസ് നേതാവ് തുഷാര്‍ വെള്ളാപ്പള്ളിയുടെ പരാമര്‍ശം കേരള കോണ്‍ഗ്രസിലെ ഭിന്നതയ്ക്ക് ആക്കം കൂട്ടിയിട്ടുണ്ട്.
