തന്റെ രാജ്യത്തിനായി തോക്കെടുക്കേണ്ടിവന്നാല്‍ അതിനും തയ്യാറാണെന്ന് ഇന്ത്യന്‍ ക്രിക്കറ്റ് താരം ഹര്‍ഭജന്‍ സിംഗ്. വിമര്‍ശകര്‍ക്ക് മുന്നില്‍ തന്റെ രാജ്യസ്നേഹം തെളിയിക്കേണ്ട ആവശ്യമില്ലെന്നും എന്റെ രാജ്യത്തിനെതിരായി ഞാൻ എന്തെങ്കിലും ചെയ്‌തെന്ന് ആരും പറയുമെന്ന് തോന്നുന്നില്ലെന്നും ഹര്‍ഭജന്‍ വ്യക്തമാക്കി. ഇന്ത്യയ്‌ക്കെതിരെയും പ്രധാനമന്ത്രി നരേന്ദ്രമോദിക്കെതിരെയും പ്രസ്താവന നടത്തിയ പാകിസ്ഥാന്‍ ക്രിക്കറ്റ് താരം ഷഹീദ് അഫ്രീദിയെ ഹര്‍ഭജന്‍ രൂക്ഷമായി വിമര്‍ശിച്ചു. ഇന്ത്യയെക്കുറിച്ച് മോശം പറയാൻ അഫ്രീദിക്ക് യാതൊരു അവകാശവുമില്ലെന്നും അയാൾ സ്വന്തം രാജ്യത്തിന്റെ പരിധിക്കുള്ളിൽ നിൽക്കുന്നതാണ് നല്ലതെന്നും ഹര്‍ഭജന്‍ മുന്നറിയിപ്പ് നല്‍കി.
