വെസ്റ്റ് ഇന്‍ഡീസിനെതിരായ ആദ്യ ടെസ്റ്റില്‍ ഇന്ത്യക്ക് വേണ്ടി അഞ്ച് വിക്കറ്റുകള്‍ വീഴ്ത്തിയിരിക്കുകയാണ് ടെസ്റ്റിലെ ഒന്നാം നമ്പര്‍ ബൗളര്‍ കൂടിയായ രവിചന്ദ്രന്‍ അശ്വിന്‍. അഞ്ച് വിക്കറ്റ് നേട്ടത്തിനൊപ്പം മറ്റൊരു അപൂര്‍വ റെക്കോര്‍ഡും അശ്വിന്‍ സ്വന്തമാക്കി. അച്ഛനേയും മകനേയും പുറത്താക്കുന്ന ആദ്യ ഇന്ത്യന്‍ ബൗളര്‍ എന്ന നേട്ടമാണ് അത്. വെസ്റ്റ് ഇന്‍ഡീസിന്റെ ഒന്നാം ഇന്നിങ്‌സില്‍ ടാഗ്നരെയ്ന്‍ ചന്ദര്‍പോളിന്റെ വിക്കറ്റ് വീഴ്ത്തിയതോടെയാണ് അശ്വിന്‍ ഈ അപൂര്‍വ നേട്ടം കൈവരിച്ചത്.
ടാഗ് നരെയ്ന്‍ ചന്ദര്‍പോളിനെ അശ്വിന്‍ ബൗള്‍ഡ് ആക്കുകയായിരുന്നു. 44 പന്തില്‍ 12 റണ്‍സാണ് ടാഗ് നരെയ്ന്‍ നേടിയത്. വെസ്റ്റ് ഇന്‍ഡീസ് ഇതിഹാസം ശിവ നരെയ്ന്‍ ചന്ദര്‍പോളിന്റെ മകനാണ് ടാഗ് നരെയ്ന്‍ ചന്ദര്‍പോള്‍. വര്‍ഷങ്ങള്‍ക്ക് മുന്‍പ് ശിവനരെയ്ന്‍ ചന്ദര്‍പോളിനെ അശ്വിന്‍ പുറത്താക്കിയിട്ടുണ്ട്.