അന്താരാഷ്ട്ര ക്രിക്കറ്റില്‍ നിന്നുമുള്ള വിരമിക്കല്‍ തീരുമാനം പിന്‍വലിച്ച് ക്രിക്കറ്റില്‍ തിരിച്ചുവരവിനൊരുങ്ങി ദക്ഷിണാഫ്രിക്കന്‍ മുന്‍ നായകന് ഫാഫ് ഡുപ്ലെസിസ്. ദക്ഷിണാഫ്രിക്കയുടെ ടി20 ടീമിലേക്ക് തിരിച്ചെത്താനാണ് ഡുപ്ലെസിസ് ആലോചിക്കുന്നത്. അടുത്ത വര്‍ഷത്തെ ടി20 ലോകകപ്പില്‍ രാജ്യത്തിനായി കളിക്കുക എന്ന മോഹത്തോടെയാണ് 39കാരനായ താരം തിരിച്ചെത്തുന്നത്.
അന്താരാഷ്ട്ര ക്രിക്കറ്റില്‍ മടങ്ങിയെത്താനുള്ള കായികക്ഷമത തനിക്ക് ഇപ്പോഴുമുണ്ടെന്നും അതിനായി പരിശ്രമം ചെയ്യാന്‍ തയ്യാറാണെന്നും ഡുപ്ലെസിസ് പറയുന്നു. അതേസമയം മുന്‍ നായകന് മുന്നില്‍ ടീമിന്റെ വാതിലുകള്‍ അടച്ചിട്ടില്ലെന്ന് ദക്ഷിണാഫ്രിക്കന്‍ കോച്ചായ റോബ് വാള്‍ട്ടര്‍ പറഞ്ഞു. 2020 ഡിസംബറിലാണ് ഡുപ്ലെസിസ് അവസാനമായി ദക്ഷിണാഫ്രിക്കന്‍ ടീമില്‍ കളിച്ചത്. അന്താരാഷ്ട്ര ക്രിക്കറ്റില്‍ നിന്നും വിരമിച്ചെങ്കിലും ഐപിഎല്‍ ഉള്‍പ്പടെയുള്ള ഫ്രാഞ്ചൈസി ക്രിക്കറ്റ് ലീഗുകളില്‍ ഇപ്പോഴും സജീവമാണ് താരം. ദീര്‍ഘകാലമായി ചെന്നൈ സൂപ്പര്‍ കിംഗ്സിൽ കളിച്ചിരുന്ന താരം കഴിഞ്ഞ സീസണില്‍ ആർസിബിക്കായി 14 കളികളില്‍ നിന്ന് 8 അര്‍ധസെഞ്ചുറിയടക്കം 730 റണ്‍സാണ് താരം അടിച്ചുകൂട്ടിയത്.
