നടന്‍ സുശാന്ത് സിംഗ് രജ്‌പുതിന്‍റെ പെട്ടെന്നുള്ള മരണം രാജ്യത്തെയാകെ ഞെട്ടിച്ചിരിക്കുകയാണ്. ആത്‌മഹത്യയാണെന്നാണ് പൊലീസിന്‍റെ പ്രാഥമിക നിഗമനം. മുംബൈ ബാന്ദ്രയിലെ വസതിയില്‍ പൊലീസ് പരിശോധന തുടരുകയാണ്. സുശാന്തിന്‍റെ ആത്‌മഹത്യാക്കുറിപ്പൊന്നും ഇതുവരെ കണ്ടെത്താനായിട്ടില്ല. എന്നാല്‍ ചില മെഡിക്കല്‍ പ്രിസ്‌ക്രിപ്ഷനുകള്‍ പൊലീസിന് കിട്ടിയിട്ടുണ്ട്.
പ്രഥമദൃഷ്‌ട്യാ സുശാന്തിന്‍റേത് തൂങ്ങിമരണമാണെങ്കിലും മറ്റ് സാധ്യതകളും പൊലീസ് അന്വേഷിക്കുന്നുണ്ട്. സുശാന്തിന്‍റെ മുന്‍ മാനേജരായിരുന്ന ദിശാ സാലിയന്‍ കഴിഞ്ഞ ദിവസം ഒരു കെട്ടിടത്തിന്‍റെ പതിനാലാം നിലയില്‍ നിന്ന് വീണുമരിച്ചിരുന്നു. ആ മരണവുമായി സുശാന്തിന്‍റെ മരണത്തിന് എന്തെങ്കിലും ബന്ധമുണ്ടോയെന്നും പൊലീസ് അന്വേഷിക്കുന്നു.
