മകള്‍ ലക്ഷ്മിയുടെ മരണത്തെ കുറിച്ച് ഒരു അഭിമുഖത്തില്‍ നടന്‍ സുരേഷ് ഗോപി വിതുമ്പി പറഞ്ഞ കാര്യങ്ങളാണ് ഇപ്പോള്‍ ഓരോ മലയാളിയുടേയും നെഞ്ച് തകര്‍ക്കുന്നത്. തനിക്ക് ലക്ഷ്മി ആരായിരുന്നെന്നും മകളുടെ മരണം എത്രത്തോളം തന്നെ തളര്‍ത്തിയെന്നും സുരേഷ് ഗോപി ഈ അഭിമുഖത്തില്‍ സംസാരിച്ചിരുന്നു. അതിനിടയിലാണ് സുരേഷ് ഗോപിയുടെ മകളുടെ മരണത്തെ കുറിച്ചുള്ള പഴയൊരു വാര്‍ത്ത പ്രേക്ഷകര്‍ക്കിടയില്‍ ചര്‍ച്ചയായിരിക്കുന്നത്.
നടന്‍ ഇന്ദ്രന്‍സ് വസ്ത്രാലങ്കാരകനായി പ്രവര്‍ത്തിച്ചിരുന്ന കാലമായിരുന്നു അത്. സുരേഷ് ഉണ്ണിത്താന്‍ ചിത്രം ഉത്സവമേളത്തില്‍ സുരേഷ് ഗോപിക്കൊപ്പം ഇന്ദ്രന്‍സും പ്രവര്‍ത്തിക്കുന്നുണ്ട്. വളരെ കളര്‍ഫുള്‍ ആയ വസ്ത്രങ്ങളാണ് ആ ചിത്രത്തില്‍ ഇന്ദ്രന്‍സ് തനിക്ക് വേണ്ടി തയ്യാറാക്കിയതെന്ന് സുരേഷ് ഗോപി പറയുന്നു. ഒരു രംഗത്തില്‍ മഞ്ഞയില്‍ നേര്‍ത്ത വരകളുള്ള ഷര്‍ട്ടാണ് ധരിച്ചിരുന്നത്. ആ മഞ്ഞ ഷര്‍ട്ടിനോട് തനിക്ക് വല്ലാതെ ഇഷ്ടം തോന്നിയെന്നും ഷൂട്ടിങ് കഴിഞ്ഞ് ആ ഷര്‍ട്ട് തനിക്ക് തരണമെന്ന് ഇന്ദ്രന്‍സിനോട് ആവശ്യപ്പെട്ടെന്നും സുരേഷ് ഗോപി പറയുന്നു. ഷൂട്ടിങ് കഴിഞ്ഞപ്പോള്‍ ആ ഷര്‍ട്ട് ഇന്ദ്രന്‍സ് സുരേഷ് ഗോപിക്ക് നല്‍കി. അത് ഇടയ്ക്കിടെ ഇടാറുണ്ടെന്നും സുരേഷ് ഗോപി പറയുന്നു.
' അപകടമറിഞ്ഞ് എത്തി ആശുപത്രിയില്‍ എന്റെ മകളുടെ അടുത്തു നില്‍ക്കുമ്പോഴൊക്കെ വിയര്‍പ്പില്‍ കുതിര്‍ന്ന ആ ഷര്‍ട്ട് ആയിരുന്നു എന്റെ വേഷം. എന്റെ വിയര്‍പ്പിന്റെ മണം ഏറ്റവുമധികം ഇഷ്ടപ്പെട്ടിരുന്ന മകളാണ്. ലക്ഷ്മിക്ക് അന്തിയുറങ്ങാന്‍ അവസാനമായി അവളുടെ പെട്ടി മൂടുന്നതിനു മുന്‍പ്, വിയര്‍പ്പില്‍ കുതിര്‍ന്ന ആ മഞ്ഞ ഷര്‍ട്ട് ഊരി അവളെ ഞാന്‍ പുതപ്പിച്ചു. ഇന്ദ്രന്‍സ് തുന്നിയ ആ ഷര്‍ട്ടിന്റെ ചൂടേറ്റാണ് എന്റെ മകള്‍ അന്ത്യ വിശ്രമം കൊള്ളുന്നത്. ഇന്ദ്രന്‍സിനോട് ഒരുപാട് സ്‌നേഹം,' സുരേഷ് ഗോപി പറഞ്ഞു.
