രാത്രി 11 മണിക്ക് ശേഷമുള്ള ഷോകള്‍ക്ക് 16 വയസ്സില്‍ താഴെയുള്ള കുട്ടികളെ അനുവദിക്കരുതെന്ന സുപ്രധാനമായ ഉത്തരവുമായി തെലങ്കാന ഹൈക്കോടതി. ഉത്തരവ് അടിയന്തിരമായി നടപ്പാക്കാന്‍ സംസ്ഥാന സര്‍ക്കാരിനോട് ജസ്റ്റിസ് ബി വിജയസെന്‍ റെഡ്ഡിയുടെ ബെഞ്ച് നിര്‍ദേശം നല്‍കി. നിയന്ത്രണം തിയേറ്ററുകളിലും തിയേറ്റര്‍ കോമ്പ്‌ലക്‌സുകളിലും മള്‍ട്ടി പ്ലക്‌സുകളിലും ബാധകമാകും. രാത്രി 11 മണിമുതല്‍ രാവിലെ 11 മണിയവരെ നിയന്ത്രണം നടപ്പാക്കുന്ന കാര്യം തിയേറ്ററുടമകളുമായി ചര്‍ച്ച ചെയ്ത് തീരുമാനിക്കണം. അത് വരെ 11 മണിക്ക് ശേഷം കുട്ടികളെ തിയേറ്ററില്‍ കൊണ്ടുവരുന്നത് വിലക്കണമെന്നാണ് ഉത്തരവ്.
