മലയാളത്തിന്റെ ഏറ്റവും താരമൂല്യമുള്ള നടനാണെങ്കിലും സമീപകാലത്തായി മോഹന്‍ലാല്‍ സിനിമകളുടെ ബോകോഫീസ് പ്രകടനം മോശമാണ്. പുതുമുഖ സംവിധായകര്‍ക്ക് അവസരങ്ങള്‍ നല്‍കാതെ സുഹൃദ് വലയത്തിലുള്ള സംവിധായകര്‍ക്ക് മാത്രം അവസരങ്ങള്‍ നല്‍കുന്നതാണ് മോഹന്‍ലാലിന്റെ ഈ വീഴ്ചയ്ക്ക് കാരണമെന്ന അഭിപ്രായമാണ് മോഹന്‍ലാല്‍ ആരാധകര്‍ക്കുള്ളത്. ലിജോ ജോസ് പെല്ലിശ്ശേരിക്കൊപ്പം ചെയ്ത മലൈക്കോട്ടെ വാലിബന്‍ നിരാശപ്പെടുത്തിയെങ്കിലും കൂടുതല്‍ യുവ സംവിധായകര്‍ക്കൊപ്പം ലാലേട്ടന്‍ പ്രവര്‍ത്തിക്കണമെന്നാണ് മോഹന്‍ലാല്‍ ആരാധകരുടെ ആവശ്യം.
ഒരുഭാഗത്ത് പുതിയ പരീക്ഷണ സിനിമകളുടെയും വാണിജ്യ സിനിമകളുടെയും ഭാഗമായി മമ്മൂട്ടി സജീവമായി നില്‍ക്കുമ്പോള്‍ മോഹന്‍ലാലും സമാനമായി സിനിമകള്‍ ചെയ്യണമെന്ന് പ്രേക്ഷകര്‍ ഏറെക്കാലമായി അഭിപ്രായപ്പെടുന്നതാണ്. നിലവില്‍ തരുണ്‍ മൂര്‍ത്തിക്കൊപ്പം എല്‍ 360 ചെയ്തുകൊണ്ടിരിക്കുന്ന മോഹന്‍ലാല്‍ തന്റെ അടുത്ത സിനിമയ്ക്കായി ആവാസവ്യൂഹം സംവിധായകന് കൃഷാന്ദിന് ഡേറ്റ് നല്‍കിയെന്നാണ് പുതിയ റിപ്പോര്‍ട്ടുകള്‍.
സംവിധായകന് സത്യന്‍ അന്തിക്കാടിനൊപ്പം പുതിയ സിനിമയിലും മോഹന്‍ലാല്‍ ഭാഗമാവുന്നുണ്ട്. ഹൃദയപൂര്‍വം എന്ന് പേരിട്ടിരിക്കുന്ന ഈ സിനിമ നിര്‍മിക്കുന്നത് ആന്റണി പെരുമ്പാവൂരാണ്. അതേസമയം കൃഷാന്ദിനൊപ്പമുള്ള സിനിമ ഒരു ഡിറ്റക്ടീവ് സിനിമയാകുമെന്നാണ് വിവരം. അരുണാചല്‍ പ്രദേശ്, മേഘാലയ തുടങ്ങിയ സ്ഥലങ്ങളാകും സിനിമയുടെ പ്രധാന ലൊക്കേഷനുകളെന്നും സൂചനയുണ്ട്. 2025 മാര്‍ച്ചിലാകും സിനിമയുടെ ചിത്രീകരണം ആരംഭിക്കുക.
