മോഹന്‍ലാല്‍ ചിത്രങ്ങള്‍ക്ക് സാറ്റലൈറ്റ് അവകാശം 25 കോടി, വെളിപാടിന്‍റെ പുസ്തകം ഞെട്ടിച്ചു!
ബുധന്‍, 10 ജനുവരി 2018 (18:02 IST)
സാറ്റലൈറ്റ് അവകാശത്തുകയുടെ കാര്യത്തില്‍ മലയാളത്തില്‍ മമ്മൂട്ടിയും മോഹന്‍ലാലും തമ്മിലാണ് എപ്പോഴും മത്സരം. ഇവരുടെ പല സിനിമകളും നിര്‍മ്മാണച്ചെലവിനേക്കാള്‍ കൂടുതല്‍ പണം നല്‍കി ടി വി ചാനലുകള്‍ സ്വന്തമാക്കുന്നത് പതിവാണ്.
2016ല്‍ മോഹന്ലാലിന്റെ പുലിമുരുകന്‍ സാറ്റലൈറ്റ് തുകയില്‍ റെക്കോര്‍ഡിട്ടു. 2017ല്‍ മോഹന്ലാലിന്റെ തന്നെ ‘വില്ലന്‍’ വന്‍ തുകയ്ക്ക് സൂര്യ ടിവി സ്വന്തമാക്കി. അവര്‍ ക്രിസ്മസിന് ആദ്യ സം‌പ്രേക്ഷണം നടത്തുകയും ചെയ്തു.
ആശീര്‍വാദ് സിനിമാസ് നിര്‍മ്മിക്കുന്ന അഞ്ച് ചിത്രങ്ങള്‍ 25 കോടി രൂപയ്ക്ക് അമൃത ടി വി സ്വന്തമാക്കിയതായാണ് മറ്റൊരു വിവരം. ഇതില്‍ ആദ്യചിത്രം വെളിപാടിന്‍റെ പുസ്തകമായിരുന്നു. ഒടിയനും അമൃതയ്ക്ക് തന്നെ ലഭിച്ചേക്കും.
അമൃതയില്‍ മോഹന്‍ലാല്‍ ‘ലാല്‍‌സലാം’ എന്ന പരിപാടി അവതരിപ്പിക്കാന്‍ തീരുമാനിച്ചപ്പോള്‍ ഉണ്ടാക്കിയ കരാറിന്‍‌പ്രകാരമാണ് ആശീര്‍വാദ് ഇനി നിര്‍മ്മിക്കുന്ന അഞ്ച് മോഹന്‍ലാല്‍ ചിത്രങ്ങള്‍ അമൃത ഒരുമിച്ച് വാങ്ങിയത്.
