മലയാളത്തിലും തെലുങ്കിലും അടുപ്പിച്ച് സിനിമകൾ ചെയ്യുന്ന തിരക്കിലാണ് നടി മാളവിക മോഹനൻ. മലയാളത്തിൽ മോഹൻലാലിന്റെ നായികയാണെങ്കിൽ തെലുങ്കിൽ പ്രഭാസിന്റെ നായികയാണ് മാളവിക. സത്യൻ അന്തിക്കാട്-മോഹൻലാൽ കൂട്ടുകെട്ടിൽ ഒരുങ്ങുന്ന ഹൃദയപൂർവ്വത്തിന്റെ സെറ്റിൽ നിന്നും മാളവിക നേരെ ചെല്ലുന്നത് രാജാസാബ് എന്ന തെലുങ്ക് ചിത്രത്തിന്റെ സെറ്റിലേക്കാണ്. ഇപ്പോഴിതാ ദി രാജാസാബ് സിനിമയുടെ സെറ്റിൽവെച്ച് പ്രഭാസിനെ ആദ്യമായി കണ്ടപ്പോഴുള്ള അനുഭവം പങ്കിട്ടിരിക്കുകയാണ് മാളവിക.
'രാജാസാബ് സിനിമയുടെ ആവേശത്തിലാണ് ഞങ്ങൾ, എനിക്ക് ഏറ്റവും ഇഷ്ടപ്പെട്ട നിമിഷങ്ങളിൽ ഒന്ന്, ഞങ്ങളുടെ സിനിമയുടെ സെറ്റിൽ വെച്ച് പ്രഭാസ് സാറിനെ ആദ്യമായി കണ്ടപ്പോഴാണ്. ഞാൻ മറ്റൊരു സിനിമയുടെ ഷൂട്ടിങ്ങിലായിരുന്നു, ഉറക്കമില്ലാതെ ഹൈദരാബാദിലേക്ക് യാത്ര ചെയ്തിരുന്നു, വളരെ ക്ഷീണിതയായിരുന്നു, പക്ഷേ പ്രഭാസ് സാറിനെ കണ്ട നിമിഷം ഞാൻ ഉണർന്നു! അദ്ദേഹം വളരെ സ്നേഹത്തോടെയാണ് സ്വാഗതം ചെയ്തു. അദ്ദേഹം നന്നായി സംസാരിക്കുകയും ചെയ്തു,' മാളവിക മോഹനൻ പറഞ്ഞു. സോഷ്യൽ മീഡിയ പോസ്റ്റിലൂടെയാണ് പ്രഭാസിന്റെ ആദ്യമായി കണ്ട അനുഭവം മാളവിക പങ്കുവെച്ചത്.
അതേസമയം, 'കൽക്കി 2898 എ ഡി' എന്ന സിനിമയുടെ വിജയത്തിന് ശേഷം തെലുങ്ക് നടൻ പ്രഭാസിന്‍റേതായി അണിയറയിൽ ഒരുങ്ങുന്ന ചിത്രമാണ് 'ദി രാജാസാബ്'. ഹൊറർ-കോമഡി ജോണറിൽ കഥ പറയുന്ന സിനിമ ഡിസംബർ അഞ്ചിന് ആഗോളതലത്തിൽ റിലീസ് ചെയ്യും. ശൈലജ റെഡ്ഡി അല്ലുഡു, പക്കാ കൊമേഴ്സ്യൽ എന്നീ സിനിമകൾക്ക് ശേഷം മാരുതി സംവിധാനം ചെയ്യുന്ന ചിത്രമാണ് ദി രാജാസാബ്. മാരുതി തന്നെയാണ് സിനിമയുടെ രചനയും നിർവഹിച്ചിരിക്കുന്നത്.
