ആ സിനിമയിലെ 'മമ്മൂക്ക, ലാലേട്ടൻ' സീൻ യഥാർഥത്തിൽ നടന്നത്: നടന്നതെവിടെയെന്ന് പറഞ്ഞ് ദിലീഷ് പോത്തൻ

ഫീൽ ഗുഡ് സിനിമകൾക്ക് ട്രെൻഡ് സെറ്റ് ചെയ്ത സിനിമയാണ് മഹേഷിന്റെ പ്രതികാരം. ഫഹദ് ഫാസിൽ-ദിലീഷ് പോത്തൻ കൂട്ടുകെട്ടിൽ ഇറങ്ങിയ ചിത്രം മലയാളികളുടെ ഫേവറിറ്റ് സിനിമകളുടെ ലിസ്റ്റിൽ ഇടം പിടിച്ചിട്ടുണ്ട്. ചിത്രത്തിന്റെ കഥാപാത്രങ്ങളും രംഗങ്ങളും മലയാളികൾക്ക് മനഃപാഠമാണ്. 

ചിത്രത്തിൽ സൗബിൻ ഷാഹിറിന്റെ ക്രിസ്പിനും ലിജോ മോളുടെ സോണിയയും ഒരുമിച്ചുളള സീനിൽ മമ്മൂട്ടിയേയും മോഹൻലാലിനെയും കുറിച്ച് പറയുന്ന രംഗമുണ്ട്. ഈ സീൻ ഉണ്ടായതിനെ കുറിച്ച് ഒരഭിമുഖത്തിൽ തുറന്നുപറഞ്ഞിരിക്കുകയാണ് സംവിധായകൻ ദിലീഷ് പോത്തൻ. സിനിമയുടെ തിരക്കഥാകൃത്തായ ശ്യാം പുഷ്കരൻ ഒരു ബാർബർ ഷോപ്പിൽ കേട്ട രണ്ടുപേർ തമ്മിലുളള സംഭാഷണം അതേ പോലെ തന്നെ മഹേഷിന്റെ പ്രതികാരത്തിൽ ഉപയോ​ഗിക്കുകയായിരുന്നുവെന്ന് ദിലീഷ് പോത്തൻ പറഞ്ഞു. 

മമ്മൂട്ടി-മോഹൻലാൽ ആരാധകർ തമ്മിലുളള സംഭാഷണം മറ്റ് കൂട്ടിച്ചേർക്കലുകൾ ഒന്നുമില്ലാതെ ചിത്രത്തിൽ ഉപയോ​ഗിക്കുകയായിരുന്നു.  ബാർബർ ഷോപ്പിലെ ജീവനക്കാരനും മുടിവെട്ടാൻ വന്ന ആളും തമ്മിലുളള സംഭാഷണമായിരുന്നു ഇതെന്നും ഒരു മാധ്യമത്തിന് നൽകിയ അഭിമുഖത്തിൽ സംവിധായകൻ പറഞ്ഞു.

മഹേഷിന്റെ പ്രതികാരത്തിൽ ലിജോ മോൾ അവതരിപ്പിച്ച സോണിയ ട്വൻ‌റി 20 സിനിമ കാണുന്ന സമയത്താണ് സൗബിന്റെ ക്രിസ്പിൻ വീട്ടിലേക്ക് വരുന്നത്. ഈ സമയമാണ് മമ്മൂട്ടിയേയും മോഹ​ൻലാലിനെയും കുറിച്ച് ഇവർ സംസാരിക്കുന്നത്. 

ക്രിസ്പിൻ : ലാലേട്ടൻ ഫാനാ,

സോണിയ: അല്ല മമ്മൂക്ക,

ക്രിസ്പിൻ: ഞാൻ ലാലേട്ടൻ ഫാനാ, മമ്മൂക്ക പിന്നെ എന്നാ റോള് വേണേലും ചെയ്യും. തെങ്ങുകയറ്റക്കാരൻ, ചായക്കടക്കാരൻ, പൊട്ടൻ, മന്ദബുദ്ധി, എന്നാൽ ലാലേട്ടൻ- നായർ‌, മേനോൻ ഇത് വിട്ടൊരു കളിയില്ല, ടോപ് ക്ലാസ് ഓൺലി, ഇതായിരുന്നു മഹേഷിന്റെ പ്രതികാരത്തിലെ ആ രംഗം.