പതിനേഴാമത് പ്രേംനസീര് ഫൗണ്ടേഷന്‍ പുരസ്കാരം പ്രശസ്ത നടന്‍ സുരേഷ് ഗോപിക്ക്. 30000 രൂപയും പ്രശസ്തിപത്രവും അടങ്ങുന്നതാണ് പുരസ്കാരം. ഫൗണ്ടേഷന്‍ ചെയര്‍മാനും പ്രേംനസീറിന്‍റെ മകനുമായ ഷാനവാസാണ് ഇക്കാര്യം അറിയിച്ചത്.
ഏപ്രില്‍ നാലിന്‌ തൃശൂര്‍ റീജന്‍സി പ്ലാസയില്‍ നടക്കുന്ന ചടങ്ങില്‍ റവന്യൂമന്ത്രി കെ പി രാജേന്ദ്രന്‍ പുരസ്കാരം സമ്മാനിക്കും.
കെ എസ് സേതുമാധവന്‍ സംവിധാനം ചെയ്ത ഓടയില്‍ നിന്ന് എന്ന ചിത്രത്തിലൂടെ ബാലതാരമായാണ് സുരേഷ്ഗോപി അഭിനയരംഗത്തെത്തുന്നത്. ആ ചിത്രത്തിലെ ഒരു താരം പ്രേം‌നസീറായിരുന്നു എന്നത് കൌതുകമുണര്‍ത്തുന്ന കാര്യമാണ്. 1986ല്‍ ടി പി ബാലഗോപാലന്‍ എം എ എന്ന സിനിമയില്‍ ഒരു ചെറിയ വേഷത്തില്‍ അഭിനയിച്ചു. പിന്നീട് നൂറ്റമ്പതോളം ചിത്രങ്ങള്‍. ആദ്യകാലങ്ങളില്‍ വില്ലന്‍‌വേഷങ്ങളിലൂടെയാണ് സുരേഷ്ഗോപി ശ്രദ്ധിക്കപ്പെട്ടത്. വഴിയോരക്കാഴ്ചകള്‍, ഇരുപതാം നൂറ്റാണ്ട് തുടങ്ങിയ ചിത്രങ്ങള്‍ ഉദാഹരണം. നന്ദി വീണ്ടും വരിക, ജനുവരി ഒരോര്‍മ, ന്യൂഡല്‍ഹി, ഒരു സി ബി ഐ ഡയറിക്കുറിപ്പ്, 1921 തുടങ്ങിയ ആദ്യകാല ചിത്രങ്ങളില്‍ പോലും ശ്രദ്ധേയമായ കഥാപാത്രങ്ങളെയാണ് സുരേഷ് അവതരിപ്പിച്ചത്.
മനു അങ്കിള്‍, പി സി 369 എന്നീ സിനിമകളിലൂടെ കോമഡിയും തനിക്കു വഴങ്ങുമെന്ന് തെളിയിച്ച സുരേഷ്ഗോപി ‘ഇന്നലെ’ എന്ന പത്മരാജന്‍ ചിത്രത്തിലെ നരേന്ദ്രന്‍ എന്ന കഥാപാത്രത്തെ അനശ്വരമാക്കി. ഒരു വടക്കന്‍ വീരഗാഥയിലെ ആരോമല്‍ ചേകവരും സുരേഷ്ഗോപിയുടെ മികച്ച പ്രകടനത്താല്‍ ശ്രദ്ധേയമായ കഥാപാത്രമാണ്.
PRO
PRO
1989ല്‍ ന്യൂസ് എന്ന ചിത്രത്തിലൂടെ സുരേഷ്ഗോപി - ഷാജി കൈലാസ് കൂട്ടുകെട്ട് രൂപംകൊണ്ടു. ഈ ടീമിന്‍റേതായി വന്ന തലസ്ഥാനം, ഏകലവ്യന്‍, കമ്മീഷണര്‍ എന്നീ ആക്ഷന്‍ ചിത്രങ്ങള്‍ സുരേഷ്ഗോപിയെ സൂപ്പര്‍സ്റ്റാറായി ഉയര്‍ത്തി. ആക്ഷന്‍ രംഗങ്ങളിലെ മികവും ഡയലോഗ് പ്രസന്‍റേഷനിലെ കൃത്യതയും കൊണ്ട് പൊലീസ് കഥാപാത്രങ്ങളില്‍ തന്നെ മറികടക്കാന്‍ മറ്റൊരാളില്ല എന്ന് ആവര്‍ത്തിച്ചു പ്രഖ്യാപിച്ചു സുരേഷ് ഗോപി.
രണ്‍ജി പണിക്കരുടെ തകര്‍പ്പന്‍ കഥാപാത്രങ്ങള്‍ക്ക് ജീവന്‍‌കൊടുത്ത് മലയാളത്തിലെ ആക്ഷന്‍ കിംഗായി സുരേഷ്ഗോപി മാറുകയായിരുന്നു. ലേലം, പത്രം തുടങ്ങിയ സിനിമകളിലെ പ്രകടനങ്ങള്‍ ശ്വാസമടക്കിപ്പിടിച്ചാണ് പ്രേക്ഷകര്‍ കണ്ടത്. എന്നാല്‍ 2001ന് ശേഷം പൊലീസ് കഥാപാത്രങ്ങളുടെ ആവര്‍ത്തനം സുരേഷ്ഗോപിയുടെ കരിയറിനെ തന്നെ അപകടത്തിലാക്കി. നാലു വര്‍ഷത്തോളം ഈ സൂപ്പര്‍താരത്തിന് സിനിമാലോകത്തു നിന്ന് ഏതാണ്ട് പൂര്‍ണമായും മാറിനില്‍ക്കേണ്ടിഒ വന്നു. പിന്നീട് 2005ല്‍ ഭരത്‌ചന്ദ്രന്‍ ഐ പി എസ് എന്ന മെഗാഹിറ്റ് ചിത്രത്തിലൂടെ അവിശ്വസനീയമായ തിരിച്ചുവരവ് നടത്തി.
1997ല്‍ പുറത്തിറങ്ങിയ കളിയാട്ടം എന്ന സിനിമയിലെ ഗംഭീരപ്രകടനം സുരേഷ്ഗോപിക്ക് മികച്ച നടനുള്ള സംസ്ഥാന അവാര്‍ഡും ദേശീയ പുരസ്കാരവും നേടിക്കൊടുത്തു.
ശ്രീധരന്‍റെ ഒന്നാം തിരുമുറിവ്, വര്‍ണം, വചനം, ദൌത്യം, അക്ഷരത്തെറ്റ്, തൂവല്‍‌സ്പര്‍ശം, നഗരങ്ങളില്‍ ചെന്ന് രാപാര്‍ക്കാം, കൌതുകവാര്‍ത്തകള്‍, ഇന്‍ ഹരിഹര്‍ നഗര്‍, ആനവാല്‍ മോതിരം, മിഥ്യ, പാരലല്‍ കോളജ്, എന്‍റെ സൂര്യപുത്രിക്ക്, നാടോടി, ഡാഡി, പപ്പയുടെ സ്വന്തം അപ്പൂസ്, സമൂഹം, പൊന്നുച്ചാമി, പൈതൃകം, മണിച്ചിത്രത്താഴ്, മാഫിയ, ഇഞ്ചക്കാടന്‍ മത്തായി ആന്‍റ് സണ്‍സ്, ആചാര്യന്‍, ചുക്കാന്‍, സിന്ദൂരരേഖ, സാക്‍ഷ്യം, സാദരം, കുലം, ജനാധിപത്യം, ഗുരു, അനുഭൂതി, പ്രണയവര്‍ണങ്ങള്‍, കല്ലുകൊണ്ടൊരു പെണ്ണ്, ക്രൈം ഫയല്‍, തെങ്കാശിപ്പട്ടണം, രണ്ടാം ഭാവം, സുന്ദരപുരുഷന്‍, നരിമാന്‍, സസ്‌നേഹം സുമിത്ര, മകള്‍ക്ക്, ലങ്ക, ചിന്താമണി കൊലക്കേസ്, ഡിറ്റക്ടീവ്, ബ്ലാക്ക് ക്യാറ്റ്, ലാപ്‌ടോപ്പ്, നാദിയ കൊല്ലപ്പെട്ട രാത്രി, നോട്ടുബുക്ക്, ട്വന്‍റി20 തുടങ്ങിയവയാണ് സുരേഷ്ഗോപിയുടെ മികച്ച അഭിനയപ്രകടനത്താല്‍ ശ്രദ്ധേയമായ മറ്റ് ചിത്രങ്ങള്‍.
