രുചിയുടെ നാളുകള്‍ കൂടിയാണ് ക്രിസ്‌മസ് കാലം. വ്യത്യസ്തങ്ങളായ വിഭവങ്ങള്‍ ക്രിസ്‌മസ് അടുക്കളയില്‍ പാകം ചെയ്യപ്പെടുന്നു. കുടുംബാംഗങ്ങള്‍ ഒത്തുചേരുന്ന വിശുദ്ധദിനം മികച്ച ആഹാരപദാര്‍ത്ഥങ്ങളാലും കെങ്കേമമാകും. ഇതാ, അത്തരത്തില്‍ നാവില്‍ കൊതിയൂറുന്ന ക്രിസ്‌മസ് സ്‌പെഷ്യല്‍ ചിക്കന്‍ കറി വയ്ക്കുന്നത് എങ്ങനെയെന്ന് നോക്കാം.
തിരുമ്മിയതേങ്ങയില്‍ 1/2 കപ്പ് വെള്ളം ചേര്‍ത്ത് കട്ടിക്ക് തേങ്ങാപാലെടുത്തുവയ്ക്കുക. പീന്നീട് വീണ്ടും ഒരു ഗ്ലാസ് വെള്ളം ചേര്‍ത്ത് രണ്ടാം പാലെടുത്തുവയ്ക്കുക. എണ്ണ ചൂടാക്കി അരച്ച ഇഞ്ചി, ജീരകം, വെളുത്തുള്ളി, മുളകുപൊടി, മഞ്ഞള്‍പ്പൊടി, മല്ലിപൊടി, അണ്ടിപരിപ്പ് എന്നിവയും അരിഞ്ഞുവച്ചിരിക്കുന്ന സവാളയും മല്ലിയിലയും നന്നായി വഴറ്റുക. അതിലേക്ക് പാകത്തിന് ഉപ്പും ചേര്‍ത്ത് ചിക്ക്ന്‍ കഷണങ്ങള്‍ ഇട്ട് നന്നായി വഴറ്റുക. ബ്രൌണ്‍ നിറമാകുന്നതുവരെ നന്നായി വഴറ്റുക. അതിനുശേഷം തേങ്ങയുടെ രണ്ടാം പാലൊഴിച്ച് നന്നായി വേവിക്കുക. അവ നന്നായി വെന്ത് കുറുകിയ ശേഷം നാരങ്ങാനീര് ചേര്‍ത്തിളക്കുക. എന്നിട്ട് ഒന്നാം പാല്‍ ചേര്‍ക്കുക. അതിനുശേഷം തിളപ്പിക്കാന്‍ പാടില്ല.
