ഹിന്ദിയില്‍ പ്രിയദര്‍ശനോളം വിജയിച്ച ഒരു തെന്നിന്ത്യന്‍ സംവിധായകനില്ല. നല്ല മലയാള ചിത്രങ്ങള്‍ റീമേക്ക് ചെയ്താണ് അദ്ദേഹം ഹിന്ദിയില്‍ വെന്നിക്കൊടി പാറിച്ചത്. നമ്മുടെ മോഹന്‍ലാലിനെയും മുകേഷിനെയും ഇന്നസെന്‍റിനെയുമൊക്കെ അവിടെ അക്ഷയ്കുമായും സുനില്‍ ഷെട്ടിയായും പരേഷ് റാവലായും മാറ്റിയപ്പോള്‍ പ്രിയദര്‍ശന്‍ ഹിറ്റുകളുടെ പരമ്പര തന്നെ സൃഷ്ടിക്കുകയായിരുന്നു.
എന്നാല്‍ മലയാള സിനിമയും ഹിന്ദി സിനിമയും തമ്മില്‍ വലിയ വ്യത്യാസമുണ്ടെന്നും ആ വ്യത്യസ്തത മനസിലാക്കി പ്രവര്‍ത്തിച്ചാല്‍ മാത്രമേ അവിടെ പിടിച്ചുനില്‍ക്കാന്‍ കഴിയൂ എന്നും പ്രിയന്‍ വ്യക്തമാക്കുന്നു.
“മലയാളത്തില്‍ നല്ല കഥ വേണം. ഹിന്ദിയില്‍ വേണ്ടത് എന്‍റര്‍ടെയ്ന്‍‌മെന്‍റാണ്. ഹിന്ദിയില്‍ താരങ്ങളുടെ സാന്നിധ്യമാണ് പ്രേക്ഷകരെ തിയേറ്ററിലെത്തിക്കാന്‍ സഹായിക്കുന്ന പ്രധാന ഘടകം. നമ്മുടെ ഭ്രമരം, തന്‍‌മാത്ര പോലുള്ള സിനിമകള്‍ അവിടെ ചെലവാകില്ല” - പ്രിയന്‍ വ്യക്തമാക്കി.
അടുത്ത പേജില്‍ - അടുത്ത പടത്തില്‍ അഭിഷേക് ബച്ചന്‍ നായകന്‍, അതോടെ പ്രിയന്‍ നമ്പര്‍ വണ്‍ ആകും!
PRO
തുടര്‍ച്ചയായി ചില ഹിന്ദി ചിത്രങ്ങള്‍ പരാജയപ്പെട്ടതോടെ ബോളിവുഡില്‍ നിന്ന് ഒന്നകന്നു നില്‍ക്കുകയാണ് പ്രിയദര്‍ശന്‍. ആ ഇടവേളയില്‍ മലയാളത്തില്‍ മോഹന്‍ലാലിനെ നായകനാക്കി ‘ഗീതാഞ്ജലി’ ഒരുക്കുകയാണ്. അതൊരു ഹൊറര്‍ ചിത്രമാണ്. പ്രിയന്‍ തന്‍റെ കരിയറില്‍ ഇതുവരെ പരീക്ഷിച്ചിട്ടില്ലാത്ത ജോണര്‍.
ഹിന്ദിയില്‍ പ്രിയദര്‍ശന്‍റെ അടുത്ത ചിത്രം 2014 ജനുവരിയില്‍ ആരംഭിക്കും. അഭിഷേക് ബച്ചനാണ് ചിത്രത്തിലെ നായകന്‍.
പ്രിയദര്‍ശന്‍ ഇതുവരെ ഹിന്ദിയില്‍ 33 സിനിമകള്‍ സംവിധാനം ചെയ്തു. അടുത്ത ചിത്രത്തോടെ ഹിന്ദിയില്‍ ഏറ്റവും കൂടുതല്‍ സിനിമകള്‍ ചെയ്ത സംവിധായകനായി പ്രിയദര്‍ശന്‍ മാറും. അക്ഷരാര്‍ത്ഥത്തില്‍ നമ്പര്‍ വണ്‍!
