കുഞ്ഞിന് ജലദോഷവും മൂക്കടപ്പും വന്നാല്‍ പനിക്കൂര്‍ക്കയില വാട്ടിയെടുത്ത് നെറുകയില്‍ വച്ചാല്‍ മതി. അഞ്ചു ദിവസം മുതല്‍ ഒരു മാസം വരെ പ്രായമുള്ള കുട്ടികള്‍ക്ക് ഇങ്ങനെ ചെയ്യാം. ഒരു മാസം കഴിഞ്ഞ കുഞ്ഞിന് പനിക്കൂര്‍ക്കയില വാട്ടിപ്പിഴിഞ്ഞ് നീരെടുത്ത് അല്പം കല്‍ക്കണ്ടം പൊടിച്ച് ചേര്‍ത്ത് മൂന്ന് മില്ലി നല്‍കുക.
ആടലോടകത്തിന്‍റെ ഇല വാട്ടിപ്പിഴിഞ്ഞ് നീരെടുത്ത് തേന്‍ ചേര്‍ത്ത് കൊടുക്കുന്നത് കുട്ടികളുടെ ചുമയ്ക്കും കഫക്കെട്ടിനും ആശ്വാസം നല്‍കും.
കണ്‍കുരുവിന് കച്ചോലത്തിന്‍റെ കിഴങ്ങ് അരച്ച് കണ്‍പോളകളില്‍ വച്ചാല്‍ മതി. മുരിങ്ങയുടെ തളിരിലവാട്ടിപ്പിഴിഞ്ഞ് ഒഴിക്കുന്നതും മുലപ്പാല്‍ ഇറ്റിയ്ക്കുന്നതും നന്നാണ്.
കൂവളത്തില വാട്ടിപ്പിഴിഞ്ഞ് നീരെടുത്ത് ചൂടാക്കി ഒരു തുള്ളി ചെവിയില്‍ ഇറ്റിക്കുന്നത് കുട്ടികളെ അലട്ടാറുള്ള ചെവിക്കുത്തിന് നന്നാണ്. കൂവളനീര് കഴിക്കുന്നതും നന്ന്. കൂവളത്തിന്‍റെ വേരും ഉപയോഗിക്കാം.
വയറുവേദനയ്ക്ക് മുഞ്ഞയുടെ നീര് പനിക്കൂര്‍ക്കയിയുടെ നീര് എന്നിവ കൊടുത്താല്‍ മതി.
കുട്ടികളെ വിഷമിപ്പിക്കുന്ന മലബന്ധത്തിന് ഉണക്കമുന്തിരി കഴുകി ചൂടുവെളളത്തിലിട്ട് വച്ച് പിഴിഞ്ഞ് കൊടുക്കുക. ബ്രഹ്മി നീരും മലബന്ധത്തിന് ആശ്വാസം നല്‍കും.
