സ്കൂളിൽ നമ്മൾ എന്തെല്ലാം കുസൃതികൾ ഒപ്പിച്ചിരിയ്ക്കും. ആ കാലഘട്ടത്തിലെ ഓർമ്മകൾക്ക് എന്നും മധുരമാണ്. ക്ലാസിലും സ്കൂളിലുമെല്ലാം ചെയ്തുകൂട്ടിയ കുസൃതികൾ ഇപ്പോഴും സുഹൃത്തുക്കളെ കാണുമ്പോൾ നമ്മൾ പറയാറുണ്ട്. ആ നിഷ്ളങ്കമായ കുരുത്തക്കേടുകളിലേക്ക് നമ്മൂടെ ഓർമ്മകളെ കൊണ്ടുപോകുന്ന ഒരു വീഡിയോ ആണ് ഇപ്പോൾ സാമൂഹ്യ മാധ്യമങ്ങളിൽ തരംഗമാകുന്നത്.
സ്കൂൾ അസംബ്ലിയിലെ പ്രാർത്ഥനക്കിടയിൽ തന്നെ ആരും കാണുന്നില്ലെന്ന മട്ടിൽ കണ്ണുമടച്ച് കോലുമിഠായി നുണയുന്ന കുട്ടിയുടെ വീഡിയോ ആണ് സോഷ്യൽ മീഡിയ ഏറ്റെടുത്തിരിയ്ക്കുന്നത്. ഐഎഎസ് ഉദ്യോഗസ്ഥനായ അവനീഷ് ശരണാണ് വീഡിയോ ട്വിറ്ററിലൂടെ പങ്കുവച്ചത്. പങ്കുവച്ച് നിമിഷങ്ങൾക്കുള്ളിൽ തന്നെ വീഡിയോ തരംഗമായി മാറുകയും ചെയ്തു. ചുറ്റും നടക്കുന്നതൊന്നും ആ കുസൃതി അറിയുന്നില്ല.
കണ്ണടച്ചുകൊണ്ട് പ്രാർത്ഥന ഏറ്റുചൊല്ലുന്നു. ഇടക്കിടെ കോലുമിഠായിയുടെ മധുരം നുണയുന്നു. മധുരം നുണഞ്ഞുകൊണ്ട് തന്നെ പ്രാർത്ഥനയുടെ ബാക്കി ഉച്ചത്തിൽ ആലപിയ്ക്കുക്കുന്നു. തന്റെ നിഷ്കളങ്കമായ ആ കുസൃതി ഒരാൾ പകർത്തുന്നതൊന്നും അവൻ അറിഞ്ഞേയില്ല. നിരവധി പേരാണ് വീഡിയോയ്ക്ക് കമന്റുകളുമായി രംഗത്തെത്തിയത്. വീഡിയോ കണ്ടതോടെ സ്കൂൾ കാലഘട്ടത്തിലേക്ക് മടങ്ങിപ്പോയി എന്നായിരുന്നു മിക്കവരുടെയും പ്രതികരണം.
