നേപ്പാളില്‍ ഹിമാലയപര്‍വതനിരയിലുണ്ടായ മഞ്ഞുവീഴ്ചയെത്തുടര്‍ന്ന് മരിച്ചവരുടെ എണ്ണം 40 ആയി. ഇതിനിടെ മഞ്ഞിനടിയില്‍നിന്ന് 12 പേരുടെ മൃതദേഹംകൂടി ഞായറാഴ്ച കണ്ടെത്തി. ഇതോടെ മരിച്ചവരുടെ എണ്ണം 40 ആയി. ഇതില്‍ 26 പേര്‍ പര്‍വതാരോഹണത്തിന് എത്തിയവരാണ്. അവശേഷിച്ചവര്‍ സഹായികളും. ചൊവ്വാഴ്ചയുണ്ടായ ദുരന്തത്തില്‍ മൂന്ന് ഇന്ത്യക്കാരും മരിച്ചിരുന്നു.
മുസ്താംഗ്, മനാംഗ്, ദോല്‍പ എന്നിവടങ്ങളില്‍ സൈന്യം തിരച്ചില്‍ തുടരുകയാണ്. മഞ്ഞുകട്ടകള്‍ ഉറഞ്ഞു പോയതിനാല്‍ രക്ഷാപ്രവര്‍ത്തനം ദുഷ്‌കരമാണെന്ന് ദൗത്യത്തിന് നേതൃത്വംനല്‍കുന്ന നേപ്പാള്‍ ട്രക്കിംഗ് അസോസിയേഷന്‍ ഭാരവാഹികള്‍ പറഞ്ഞു. ഇതുവരെ 483 പേരെ രക്ഷപ്പെടുത്തി.
