പൊതു സ്വത്ത് നശിപ്പിക്കുന്ന സമരക്കാര്‍ക്ക് നേരെ ഭീഷണി പ്രസംഗവുമായി പശ്ചിമ ബംഗാള്‍ ബിജെപി അധ്യക്ഷന്‍ ദിലീപ് ഘോഷ്. പൊതുസ്വത്ത് നശിപ്പിക്കുന്നവരെ ഞങ്ങളുടെ സര്‍ക്കാര്‍ പട്ടികളെപ്പോലെ വെടിവച്ചിടുമെന്നാണ് ഘോഷിന്‍റെ വാക്കുകള്‍. ഞായറാഴ്ച പശ്ചിമ ബംഗാളിലെ നാദിയ ജില്ലയില്‍ ഒരു പൊതുയോഗത്തില്‍ സംസാരിക്കവെയാണ് വിവാദ പ്രസ്താവന.
സംസ്ഥാനത്ത് സിഎഎയെ അനുകൂലിച്ച് സംഘടിപ്പിച്ച സമ്മേളനത്തിലാണ് ഘോഷിന്‍റെ വിവാദ പരാമര്‍ശങ്ങളുണ്ടായിരിക്കുന്നത്. ഡിസംബര്‍ അവസാനത്തോടെയാണ് ബംഗാളില്‍ പൗരത്വ നിയമ ഭേദഗതിക്കെതിരെ വന്‍തോതിൽ പ്രതിഷേധങ്ങള്‍ ആരംഭിച്ചത്. സമരത്തില്‍ വന്‍തോതില്‍ പൊതുസ്വത്ത് നശിപ്പിക്കപ്പെട്ടിരുന്നു. ഇതിനെതിരെ കടുത്ത വിമര്‍ശനങ്ങളും ഉയര്‍ന്നിരുന്നു.
