അതിര്‍ത്തിക്ക് ഇരുപുറവുമുള്ള ജനതക്ക് സൗഹൃദവും സമാധാനവുമാണ് കരണീയമെന്നിരിക്കിലും പരസ്പരം വൈരം പുലര്‍ത്തല്‍ രാജ്യസ്നേഹത്തിന്റെ ഭാഗമായി കരുതിപ്പോരുന്ന ഇന്ത്യയുടെയും പാകിസ്ഥാന്‍െറയും ഭരണാധിപന്മാര്‍ ഒരു മുറിക്കുള്ളില്‍ മുക്കാല്‍ മണിക്കൂര്‍ നേരം ഒന്നിച്ചിരുന്നു എന്നത് തന്നെയാണ് ഈ സംഗമത്തിന്റെ പ്രധാന സവിശേഷത. തെരഞ്ഞെടുപ്പു പ്രചാരണവേളയിലെമ്പാടും പാകിസ്ഥാനെ ആഞ്ഞുവെട്ടിയ മോഡി അധികാരമേറ്റെടുക്കും മുമ്പേ കൈവരിച്ച നയതന്ത്ര നേട്ടമായാണ് ഷെറീഫിന്‍െറ വരവ് വിലയിരുത്തപ്പെടുന്നത്.
