റിലയന്‍സ് ചെയര്‍മാന്‍ മുകേഷ് അംബാനിയുടെ ഇളയമകന്‍ ആനന്ദ് അംബാനിയുടെയും വ്യവസായി വിരേന്‍ മെര്‍ച്ചന്റിന്റെ മകള്‍ രാധിക മെര്‍ച്ചന്റിന്റെയും വിവാഹം ജൂലായ് 12ന് നടക്കും. മുംബൈയില്‍ വെച്ച് നടക്കുന്ന വിവാഹചടങ്ങില്‍ സിനിമ വ്യവസായരാഷ്ട്രീയ മേഖലയിലെ പ്രമുഖര്‍ പങ്കെടുക്കും. വിവാഹത്തിന് മുന്നോടിയായുള്ള പ്രീ വെഡ്ഡിങ്ങ് ചടങ്ങുകള്‍ ഗുജറാത്തിലെ ജാം നഗറില്‍ വെച്ച് മാര്‍ച്ച് ഒന്ന് മുതല്‍ മൂന്ന് വരെയുള്ള ദിവസങ്ങളില്‍ നടക്കും.
മെറ്റാ സിഇഒ മാര്‍ക്ക് സക്കര്‍ബര്‍ഗ്,മൈക്രോസോഫ്റ്റ് സ്ഥാപകനായ ബില്‍കഗേറ്റ്‌സ്, ടെഡ് പിക് സിഇഒ മോര്‍ഗന്‍ സ്റ്റാന്‍ലി,ഖത്തര്‍ പ്രധാനമന്ത്രി മുഹമ്മദ് ബിന്‍ അബ്ദുല്‍റഹ്മാന്‍ ബിന്‍ ജാസിം അല്‍താനി എന്നിവരെല്ലാം അംബാനിക്കുടുംബത്തിലെ വിവാഹത്തില്‍ പങ്കെടുക്കാനായി എത്തിച്ചേരും. കഴിഞ്ഞ ദിവസം വിവാഹത്തിന്റെ ഔദ്യോഗികമായ ആദ്യ ക്ഷണക്കത്ത് ദൈവത്തിന് സമര്‍പ്പിച്ചുകൊണ്ട് മുകേഷ് അംബാനി ചടങ്ങ് നടത്തിയിരുന്നു.
ഇന്ത്യന്‍ ഡിസൈനറായ അനാമിക ഖന്ന തയ്യാറാക്കിയ ഫ്‌ളോറല്‍ ലഹങ്കയാണ് ചടങ്ങില്‍ രാധിക മെര്‍ച്ചന്റ് ധരിച്ചത്. വിവാഹചടങ്ങിന്റെ മറ്റ് വിവരങ്ങളൊന്നും തന്നെ അംബാനി കുടുംബം പുറത്തുവിട്ടിട്ടില്ല. അതേസമയം വിവാഹത്തിന് പ്രശസ്ത പോപ്പ് താരമായ റിഹാനയുടെ സംഗീത പരിപാടികള്‍ ഉള്‍പ്പടെയുള്ള ചടങ്ങുകള്‍ ഉണ്ടാകുമെന്നാണ് വിവരം.
