1719 ഏപ്രില്‍ 25നാണ് റോബിന്‍സണ്‍ ക്രൂസോ പ്രസിദ്ധീകരിച്ചത്. ഇംഗ്ളീഷ് സാഹിത്യത്തിലെ ആദ്യത്തെ നോവല്‍ എന്നു വിശേഷിപ്പിക്കാവുന്ന ഈ കൃതിയുടെ കര്‍ത്താവ് ഡാനിയല്‍ ഡീഫോയാണ്.
അമേരിക്കയിലെ ഒറോണോക്ക് നദീമുഖത്തിനടുത്തുള്ള ഏകാന്തദ്വീപില്‍ 28 വര്‍ഷം കഴിച്ചു കൂട്ടിയ നാവികനായ റോബിന്‍സണ്‍ ക്രൂസോയുടെ സാഹസികമായ കഥ വര്‍ണ്ണിക്കുകയാണ് ഈ നോവലില്‍.
കടല്‍ക്ഷോഭത്തില്‍ കപ്പല്‍ തകര്‍ന്ന് സഹയാത്രികര്‍ എല്ലാവരും മരിക്കുകയും ഏകനായി ദ്വീപില്‍ അകപ്പെടുകയും ചെയ്ത റോബിന്‍സണ്‍ ക്രൂസോയെ കടല്‍ക്കൊള്ളക്കാര്‍ രക്ഷിക്കുന്നതുമാണ് ഇതിലെ ഇതിവൃത്തം.
1719 ല്‍ ഈ കൃതിക്ക് നാലു രചനകള്‍ കൂടിയുണ്ടായി. യൂറോപ്യന്‍ സംസ്കാരത്തിന്‍റെ സാഹിത്യബോധ ഭാഗമായി ഈ കൃതി മാറി. ഇംഗ്ളീഷില്‍ എഴുതിയിട്ടുള്ള ഗ്രന്ഥങ്ങളില്‍ ഏറ്റവും കൂടുതല്‍ വായനക്കാരുള്ളത് ഈ കൃതിക്കാണ്. കെട്ടുകഥയെ .യാഥാര്‍ത്ഥ്യത്തിന്‍റെ രൂപം നല്‍കി അവതരിപ്പിച്ചതാണ് ഈ കൃതിയുടെ വിജയത്തിന് കാരണം.
ബൈബിള്‍ കഴിഞ്ഞാല്‍ ഏറ്റവും കൂടുതല്‍ ആളുകള്‍ വായിച്ചിട്ടുള്ളത് ഈ കൃതിക്കാണെന്ന് ഗിന്നസ് ബുക്കും സാക്ഷ്യപ്പെടുത്തുന്നു. 700 ഭാഷകളിലേയ്ക്ക് വിവര്‍ത്തനം ചെയ്തിട്ടുണ്ട്. ഇതിനെ കേന്ദ്രമാക്കി മറ്റു പല രചനകളും ഉണ്ടായിട്ടുണ്ട്.
ലണ്ടനില്‍ സ്റ്റോക്ക് ന്യൂയിങ്റ്റണ്‍ പട്ടണത്തിലെ കശാപ്പുകാരനായ ജയിംസ് ഫോയുടെ മകനാണ് ഡാനിയല്‍ ഫോ. പിന്നീടാണ് അദ്ദേഹം കുലീനാധിപത്യം തോന്നിപ്പിക്കുന്ന ഡീ എന്നത് തൂലികാനാമമായി സ്വീകരിച്ചത്. ഈ നോവല്‍ രചിക്കുന്നതിന് മുമ്പ് അദ്ദേഹം അറിയപ്പെടുന്ന ലഘുലേഘകനും പത്രപ്രവര്‍ത്തകനുമായിരുന്നു.
1703ല്‍ ജൂലൈ 31 ന് രാഷ്ട്രീയമായ ലേഖനങ്ങള്‍ എഴുതിയതിന്‍റെ പേരില്‍ അദ്ദേഹത്തെ അറസ്റ്റ് ചെയ്ത് ന്യൂഗേറ്റ് ജയിലിലേയ്ക്ക് അയച്ചു. 1708 മുതല്‍ അദ്ദേഹം സ്വതന്ത്രനായി എഴുതിത്തുടങ്ങി.
അലക്സാണ്ടര്‍ സെല്‍ക്രിക്കിന് സംഭവിച്ച കപ്പല്‍ ദുരന്തത്തെ ആധാരമാക്കിയാണ് റോബിന്‍സണ്‍ ക്രൂസേ രചിച്ചതെന്നും പറയുന്നു.
