കോഴിക്കോട് സ്വകാര്യ സ്ഥാപനത്തിൽ തീപിടുത്തം; ഒരാൾ വെന്തുമരിച്ചു

കോഴിക്കോട് നല്ലളം പോലീസ് സ്റ്റേഷനു സമീപം ടൂര്‍സ് ആന്‍റ് ട്രാവൽസ് സ്ഥാപനത്തിൽ തീപിടുത്തം. സ്ഥാപനത്തിനുള്ളിൽ നിന്ന് കത്തിക്കരിഞ്ഞ നിലയിൽ സ്ഥാപന ഉടമയുടെ മൃതദേഹം പോലീസിന് ലഭിച്ചു. നല്ലളം അരീക്കാടിന് സമീപം പ്രവര്‍ത്തിക്കുന്ന കണ്ണൻ ട്രാവൽസിനുള്ളിലാണ് തീപിടുത്തമുണ്ടായത്. അരീക്കോട് സ്വദേശി സ്വരൂപ് കുമാര്‍ ആണ് മരിച്ചത്.

റോഡിലൂടെ പോയ വാഹനയാത്രക്കാരാണ് തീപിടുത്തം നടന്ന വിവരം അറിയിച്ചത്. തുടര്‍ന്ന് മീഞ്ചന്ത ഫയര്‍ ഫോഴ്സ് ഉദ്യോഗസ്ഥര്‍ സ്ഥലത്തെത്തി തീയണയ്ക്കുകയായിരുന്നു. തീയണയ്ക്കാനുള്ള ശ്രമത്തിനിടെ കത്തിക്കരിഞ്ഞ സാധനങ്ങള്‍ക്കിടയിൽ നിന്ന് രക്തം കിനിഞ്ഞിറങ്ങുന്നത് ശ്രദ്ധയിൽപ്പെട്ടതിനെ തുടര്‍ന്ന് നടത്തിയ അന്വേഷണത്തിലാണ് മൃതദേഹം കണ്ടെത്തിയത്.

സ്ഥാപനം അകത്തു നിന്ന് പൂട്ടിയ നിലയിലായിരുന്നുവെന്നാണ് വിവരം. എന്നാൽ തീപിടുത്തത്തിന്‍റെ കാരണം വ്യക്തമല്ലെന്നും കൂടുതൽ അന്വേഷണം നടത്തേണ്ടതുണ്ടെന്നും നല്ലളം പോലീസ് സമയം മലയാളത്തോട് പറഞ്ഞു. സംഭവത്തിന് ശേഷം സ്ഥലത്ത് പോലീസ് കാവലേര്‍പ്പെടുത്തിയിട്ടുണ്ട്.