പാറശാലയിലെ ഷാരോണ്‍ വധക്കേസില്‍ താന്‍ കുറ്റമൊന്നും ചെയ്തിട്ടില്ലെന്ന് ഗ്രീഷ്മ. കോടതിയില്‍ പ്രതികളെ കുറ്റപത്രം വായിച്ചു കേള്‍പ്പിച്ചപ്പോഴാണ് കുറ്റം ചെയ്തിട്ടില്ലെന്ന് പ്രതികള്‍ പറഞ്ഞത്. ഗ്രീഷ്മ, മാതാവ് സിന്ധു, മാതൃ സഹോദരന്‍ നിര്‍മ്മലന്‍ എന്നിവര്‍ കോടതിയില്‍ ഹാജരായി. നെയ്യാറ്റിന്‍കര അഡീഷണല്‍ സെഷന്‍സ് കോടതിയാണ് കേസ് പരിഗണിക്കുന്നത്. തെളിവ് നശിപ്പിച്ചതാണ് ഗ്രീഷ്മയുടെ അമ്മയ്ക്കും സഹോദരനുമെതിരായ കുറ്റം.
കാമുകനായ ഷാരോണ്‍ രാജിനെ കഷായത്തില്‍ വിഷം കലര്‍ത്തി നല്‍കി കൊലപ്പെടുത്തിയെന്നതാണ് ഗ്രീഷ്മയ്ക്കെതിരായ കുറ്റം. സാക്ഷി വിസ്താരത്തിനായി കേസ് ഒക്ടോബര്‍ 12 ന് പരിഗണിക്കും. ഷാരോണിനെ ലൈംഗിക ബന്ധത്തിനായി വിളിച്ച് വരുത്തിയ ശേഷം വിഷം ചേര്‍ത്ത കഷായം കുടിക്കാന്‍ നല്‍കുകയായിരുന്നുവെന്നാണ് പൊലീസ് കണ്ടെത്തിയിട്ടുള്ളത്.
