ഏറ്റെടുക്കുന്നത് 290.58 ഹെക്ടര്‍ ഭൂമി, കൊച്ചിയില്‍ വരാനിരിക്കുന്നത് വന്‍ വികസനം, ബൈപാസ് നഗരത്തിന്റെ മുഖം മാറ്റും
നെട്ടൂരിനും കരയാമ്പറമ്പിനും ഇടയില്‍ ദേശീയപാത വികസന അതോറിറ്റി നിര്‍ദേശിച്ച 44 കിലോമീറ്റര്‍ നീളമുള്ള കൊച്ചി ബൈപാസിനായി സ്ഥലമേറ്റെടുക്കല്‍ നടപടികള്‍ ആരംഭിക്കുന്നു. അരൂര്‍- ഇടപ്പള്ളി എന്‍ എച്ച് 66 ബൈപാസിന്റെയും ഇടപ്പള്ളി- അങ്കമാലി എന്‍ എച്ച് 544 പാതയുടെയും തിരക്ക് കുറയ്ക്കാന്‍ ലക്ഷ്യമിട്ടാണ് പുതിയ പദ്ധതി.
ബൈപ്പാസിനായി മൊത്തം 290.58 ഹെക്ടര്‍ ഭൂമിയാണ് ഇതോടെ റവന്യൂ വകുപ്പിന് ഏറ്റെടുക്കേണ്ടതായി വരിക. ആറ് വരിയിലുള്ള നിര്‍ദിഷ്ട പദ്ധതി കൊച്ചി ബൈപ്പാസ് ഇടപ്പള്ളി- അരൂര്‍ എന്‍ എച്ച് 66 ബൈപാസിലെ നെട്ടൂരില്‍ നിനും ആരംഭിച്ച് എന്‍ എച്ച് 544 ലെ അങ്കമാലിക്ക് വടക്ക് സ്ഥിതി ചെയ്യുന്ന കരയാം പറമ്പില്‍ അവസാനിക്കുന്ന രീതിയിലാണ് വിഭാവനം ചെയ്തിരിക്കുന്നത്. ആലുവ( 6 വില്ലേജുകള്‍),കുന്നത്തുനാട്(8 വില്ലേജുകള്‍),കണയന്നൂര്‍(4 വില്ലേജുകള്‍) താലൂക്കുകളിലെ 18 വില്ലേജുകളില്‍ നിന്നായാണ് ദേശീയ പാത ഇടനാഴിക്കായി ഭൂമി ഏറ്റെടുക്കുന്നത്.
