എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍ നയിക്കുന്ന സമത്വമുന്നേറ്റയാത്രയെ രൂക്ഷമായ ഭാഷയില്‍ വിമര്‍ശിച്ചു കോണ്‍ഗ്രസ് വൈസ് പ്രസിഡന്റ് എംഎം ഹസന്‍ രംഗത്ത്. വെള്ളാപ്പള്ളി നടേശന്‍ ആര്‍എസ്എസിന്റെ ഉച്ചഭാഷണിയാണ്. ആര്‍എസ്എസ് അജണ്ടകള്‍ നടപ്പാക്കാനാണ് വെള്ളാപ്പള്ളി സമത്വ മുന്നേറ്റ യാത്ര നടത്തുന്നതെന്നും അദ്ദേഹം പറഞ്ഞു.
സമത്വമുന്നേറ്റയാത്രയെ രൂക്ഷമായ ഭാഷയില്‍ വിമര്‍ശിച്ചു മുസ്‌ലിം ലീഗ് നേതാവും മന്ത്രിയുമായ പികെ കുഞ്ഞാലിക്കുട്ടിയും സിപിഐ സംസ്ഥാന സെക്രട്ടറി കാനം രാജേന്ദ്രനും രംഗത്തെത്തിയിരുന്നു.
സമത്വ മുന്നേറ്റ യാത്രയ്ക്കെതിരേ യുഡിഎഫ് ശക്തമായ പ്രചരണം നടത്തും. വര്‍ഗീയതയെ ചെറുക്കാന്‍ കക്ഷി രാഷ്ട്രീയത്തിനു അതീതമായി സഖ്യമുണ്ടാക്കുന്നതില്‍ തെറ്റില്ലെന്നും കുഞ്ഞാലിക്കുട്ടി പറഞ്ഞു. വെള്ളാപ്പള്ളിയുടെ സമത്വമുന്നേറ്റയാത്ര സമൂഹത്തെ ഭിന്നിപ്പിക്കാനുള്ളതാണെന്നു കാനം രാജേന്ദ്രനും പറഞ്ഞു.
സമത്വമുന്നേറ്റയാത്ര കണ്ണൂര്‍ ജില്ലയില്‍ എത്തിയിരിക്കുകയാണ്. തളിപ്പറമ്പില്‍ നടന്ന ആദ്യ സ്വീകരണയോഗത്തില്‍ നിരവധി പേര്‍ എത്തി. ഉച്ചകഴിഞ്ഞ് മൂന്നിന് കണ്ണൂര്‍ ടൌണ്‍ സ്ക്വയറില്‍ യാത്രയ്ക്ക് സ്വീകരണം നല്‍കും. ഡിസംബര്‍ അഞ്ചിന് തിരുവനന്തപുരം ശംഖുമുഖത്താണ് യാത്രയുടെ സമാപനം.
