സംസ്ഥാനത്ത് നഗര-ഗ്രാമ അന്തരം ഇല്ലാത്തത് കോവിഡ് വ്യാപനത്തിനു കാരണമായെന്ന് കേന്ദ്രസംഘം ചൂണ്ടിക്കാട്ടി. 55 ശതമാനം പേര്‍ക്കെങ്കിലും കേരളത്തില്‍ കോവിഡ് ബാധിച്ചിട്ടില്ല. കേരളത്തില്‍ മുതിര്‍ന്ന പൗരന്‍മാരുടെ എണ്ണം കൂടുതലാണ്. കൂടുതല്‍ ഇളവുകള്‍ രോഗവ്യാപനം വര്‍ധിപ്പിക്കും. പ്രാദേശിക ലോക്ക്ഡൗണ്‍ കര്‍ശനമാക്കണം. ഇപ്പോള്‍ നല്‍കിയിരിക്കുന്ന ഇളവുകള്‍ വെല്ലുവിളിയെന്നും കേന്ദ്രസംഘത്തിന്റെ റിപ്പോര്‍ട്ടില്‍ പറയുന്നു.
കേന്ദ്രസംഘത്തിന്റെ റിപ്പോര്‍ട്ട് കൂടി കണക്കിലെടുത്ത് പ്രാദേശിക ലോക്ക്ഡൗണ്‍ കര്‍ശനമാക്കാന്‍ സംസ്ഥാനവും ആലോചിക്കുന്നു. പ്രതിവാര ഇന്‍ഫെക്ഷന്‍ പോപ്പുലേഷന്‍ റേഷ്യോ (ഡബ്‌ള്യു.ഐ.പി.ആര്‍.) എട്ടിനുമുകളിലുള്ള പ്രദേശങ്ങളില്‍ ലോക്ക്ഡൗണ്‍ ഏര്‍പ്പെടുത്തുമെന്ന് മുഖ്യമന്ത്രി പിണറായി വിജയന്‍ കോവിഡ് അവലോകനയോഗത്തില്‍ പറഞ്ഞു. മുന്‍പ് ഡഡബ്‌ള്യു.ഐ.പി.ആര്‍. പത്തിനുമുകളിലുള്ള പ്രദേശങ്ങളിലാണ് ലോക്ക്ഡൗണ്‍ ഏര്‍പ്പെടുത്തിയിരുന്നത്. ഇത്തരത്തിലുള്ള 266 വാര്‍ഡുകളാണുണ്ടായിരുന്നത്. പുതുക്കിയ മാനദണ്ഡങ്ങള്‍ വ്യാഴാഴ്ച നിലവില്‍വരും.
