സി പി എമ്മിന്റെ സംസ്ഥാന സെക്രട്ടറിയേറ്റ് യോഗത്തിൽ പങ്കെടുക്കാൻ മുൻമന്ത്രി ഇ പി ജയരാജൻ എത്തി. യോഹത്തിൽ പങ്കെടുക്കുന്നതിനായി ഇ പി ജയരാജൻ എ കെ ജി സെന്ററിൽ എത്തിയിരിക്കുകയാണ്. തനിക്കെതിരെയുള്ള വിജിലൻസ് ത്വരിതാന്വേഷണം പൂർത്തിയാക്കുന്നതിനു മുമ്പേ പിണറായി മന്ത്രിസഭയിലേക്ക് മറ്റൊരു മന്ത്രിയെ ചുമതലപ്പെടുത്തിയ സംഭവത്തിൽ പാർട്ടിയുമായി ഇടഞ്ഞ് നിൽക്കുകയായിരുന്നു ഇ പി ജയരാജൻ.
പുതിയ മന്ത്രിയെ തിരഞ്ഞെടുക്കുന്നതിനായി ഈ മാസം 20ന് ചേർന്ന യോഗത്തിൽ നിന്നും ഇ പി ഇറങ്ങിപ്പോയതും മന്ത്രി എം എം മണിയുടെ സത്യപ്രതിജ്ഞ ചടങ്ങിൽ പങ്കെടുക്കാൻ എത്താതിരുന്നതും യോഗത്തിൽ ചർച്ച ചെയ്തേക്കാം. സെക്രട്ടേറിയറ്റ് യോഗത്തിൽനിന്നു ക്ഷുഭിതനായി ഇറങ്ങിപ്പോയ ഇ പി മുഖ്യമന്ത്രി പിണറായി വിജയന്‍ അഭ്യർഥിച്ചിട്ടും സംസ്ഥാന സമിതിയില്‍ പങ്കെടുത്തില്ല. സത്യപ്രതിജ്ഞ ചടങ്ങിൽ ഇ പി എത്താതിരുന്നത് അച്ചടക്ക ലംഘനമാണെന്ന് ഒരു വിഭാഗം നേതാക്കൾ പറയുന്നുണ്ട്.
