എറണാകുളം : കൈക്കൂലി കേസില്‍ കൃഷി അസിസ്റ്റന്റ് വിജിലന്‍സിന്റെ പിടിയിലായി. ഭൂമി തരം മാറ്റലിന് കൈക്കൂലി ആവശ്യപ്പെട്ട പണം വാങ്ങുന്നതിനിടെയാണ് കൃഷി അസിസ്റ്റന്റ് വിജിലന്‍സിന്റെ പിടിയിലായത്. എറണാകുളം വൈറ്റില കൃഷി ഓഫീസിലെ കൃഷി അസിസ്റ്റന്റും ആറ്റിങ്ങല്‍ സ്വദേശിയുമായ ശ്രീരാജിനെയാണ് കഴിഞ്ഞ ദിവസം വിജിലന്‍സ് അറസ്റ്റ് ചെയ്തത്.
പരാതിക്കാരന്‍ കഴിഞ്ഞ മുപ്പത് വര്‍ഷമായി കുടുംബമായി താമസിച്ചു വരുന്ന 7 സെന്റ് ഭൂമി തരംമാറ്റുന്നതിന് 2023 ജൂണില്‍ ആര്‍.ഡി.ഒ ക്ക് ഓണ്‍ലൈനില്‍ അപേക്ഷ നല്‍കിയിരുന്നു. തുടര്‍ന്ന് പരിശോധനക്കായി വൈറ്റില കൃഷി ഓഫീസിലേക്ക് അപേക്ഷ അയച്ചു നല്‍കി. അപേക്ഷയില്‍ സ്വീകരിച്ച നടപടി അറിയുന്നതിനായി പല തവണ പരാതിക്കാരന്‍ കൃഷി ഓഫീസിലെത്തിയെങ്കിലും വിവിധ കാരണങ്ങള്‍ പറഞ്ഞ് ഉദ്യോഗസ്ഥര്‍ പരാതിക്കാരനെ മടക്കി അയച്ചിരുന്നു.
ഇതിനെ തുടര്‍ന്ന് കഴിഞ്ഞ ആഴ്ചയാണ് വൈറ്റില കൃഷി ഓഫീസിലെ കൃഷി അസിസ്റ്റന്റായ ശ്രീരാജ് സ്ഥല പരിശോധന നടത്തിയ ശേഷം പരാതിക്കാരനോട് രണ്ടായിരം രൂപ കൈക്കൂലി ആവശ്യപ്പെട്ടത്. പണവുമായി ദേശാഭിമാനി റോഡില്‍ വന്നു കാണാനാണ് ശ്രീരാജ് ആവശ്യപ്പെട്ടത്. പരാതിക്കാരന്‍ ഈ വിവരം എറണാകുളം വിജിലന്‍സ് യൂണിറ്റ് ഡെപ്യൂട്ടി പൊലീസ് സൂപ്രണ്ടിനെ അറിയിച്ചു വിജിലന്‍സ് സംഘം ഇയാളെ പിടികൂടാനായി കെണിയൊരുക്കി
