ബാബുവിനെതിരേ വിജിലന്‍സ് അന്വേഷണം, കൊച്ചി യൂണിറ്റിന് അന്വേഷണ ചുമതല
ബാര്‍ ഓണേഴ്‌സ് വര്‍ക്കിംഗ് പ്രസിഡന്റ് ബിജു രമേശിന്റെ രഹസ്യമൊഴിയുടെ അടിസ്ഥാനത്തില്‍ എക്സൈസ് മന്ത്രി കെ ബാബുവിനെതിരേ അന്വേഷണം നടത്താന്‍ വിജിലന്‍സ് തീരുമാനിച്ചു. വിജിലൻസ് എസ് പി സുകേശന്റെ റിപ്പോര്‍ട്ടിന്റെ അടിസ്ഥാനത്തിലാണ് പ്രത്യേക അന്വേഷണം നടത്താന്‍ വിജിലന്‍സ് തയാറായിരിക്കുന്നത്. വിജിലന്‍സ് കൊച്ചി യൂണിറ്റിനാണ് അന്വേഷണ ചുമതല. ബിജു രമേശിന്റെ മൊഴിപ്രകാരം ഇടപാടുകള്‍ നടന്നത് എറണാകുളത്താണ്.
നേരത്തെ ബാബുവിനെതിരെ പ്രത്യേക അന്വേഷണം ആവശ്യമില്ലെന്നായിരുന്നു വിജിലന്‍സ് നിയമപദേഷ്ടാവ് നിയമോപദേശം നല്‍കിയിരുന്നത്. എന്നാല്‍ ഇത് തള്ളിക്കളഞ്ഞാണ് കേസില്‍ വിജിലന്‍സ് പ്രത്യേക അന്വേഷണം നടത്താന്‍ തീരുമാനിച്ചിരിക്കുന്നത്. ബാർ ലൈസൻസ് ഫീസ് കുറയ്ക്കുന്നതിന് പത്തു കോടി രൂപ ബാബുവിന് നൽകിയതായി ബിജു രമേശ് നേരത്തെ മൊഴി നൽകിയിരുന്നു. ബാര്‍ ഉടമകള്‍ 10 കോടി രൂപ സമാഹരിച്ച് എറണാകുളത്തുവച്ച് ബാബുവിന് നല്‍കിയെന്നാണ് രഹസ്യമൊഴി.
