ജേക്കബ് തോമസിനെതിരെയുള്ള അന്വേഷണത്തിന്‍റെ അന്തിമ റിപ്പോര്‍ട്ട് ധനകാര്യ പരിശോധനാവിഭാഗം ചൊവ്വാഴ്ച സമര്‍പ്പിക്കും. ഈ റിപ്പോര്‍ട്ടില്‍ ജേക്കബ് തോമസിനെതിരെ നടപടിക്ക് ശുപാര്‍ശയുണ്ടെന്നാണ് വിവരം. ഇത് മുന്‍‌കൂട്ടി മനസിലാക്കിയാണ് ജേക്കബ് തോമസ് മുഖ്യമന്ത്രിയോടും ചീഫ് സെക്രട്ടറിയോടും പരാതി അറിയിച്ചിരിക്കുന്നത്.
ജേക്കബ് തോമസ് തുറമുഖ വകുപ്പ് ഡയറക്ടറായിരിക്കെ ഉപകരണങ്ങള്‍ വാങ്ങിയതില്‍ ക്രമക്കേടുണ്ടെന്നാണ് ആരോപണം ഉയര്‍ന്നത്. എന്നാല്‍ ധനകാര്യ സെക്രട്ടറി കെ എം ഏബ്രഹാമിനെതിരെ വിജിലന്‍സ് സ്വീകരിച്ച നടപടികളോടുള്ള പ്രതികാരമാണ് ഇപ്പോള്‍ ഉണ്ടാകുന്ന നടപടികളെന്നാണ് ജേക്കബ് തോമസ് മുഖ്യമന്ത്രിക്ക് അയച്ച കത്തില്‍ ആരോപിക്കുന്നത്.
